10 წელი გავიდა მას შემდეგ, რაც ნილ გეიმანის ნოველის ეკრანიზაცია “კორალაინი” გამოვიდა და ჩვენი საყვარელი ანიმაციების ჩამონათვალში საპატიო ადგილიც დაიკავა.
სიუჟეტი მოგვითხრობს პატარა გოგონას შესახებ, რომელიც მშობლებთან ერთად საცხოვრებელ ადგილს იცვლის. ახალ სახლში კი პოულობს საიდუმლო გასასვლელს, რომლის საშუალებითაც ის ჯადოსნურ, ერთი შეხედვით იდეალურ სამყაროში ხვდება.
ამბის თხრობას აქ შევწყვეტთ, რადგან თუ კორალაინი ნანახი არ გაქვთ, წინ ძალიან საინტერესო სეანსი გელით. ჩვენ კი უბრალოდ წარმოგიდგენთ 10 აქამდე უცნობ ფაქტს ამ შესანიშნავი ფილმის შესახებ:
1. “კორალაინი” ანიმაცია არ უნდა ყოფილიყო
თავდაპირველი ჩანაფიქრით, “კორალაინი” მხატვრული ფილმი უნდა ყოფილიყო, რომელშიც მთავარ როლს დაკოტა ფენინგი შეასრულებდა… თუმცა, ჰენრი სელიკი სულ სხვანაირად ფიქრობდა. ის მიიჩნევდა, რომ ამ სიუჟეტს ანიმაციური ფორმატი გაცილებით უფრო მოუხდებოდა. საბედნიეროდ, რეჟისორმა თავისი გაიტანა, დაკოტას კი “სამსახური” სულაც არ დაუკარგავს, რადგან მან კორალაინის პერსონაჟი გაახმოვანა.
2. “კორალაინის” შექმნას თითქმის 4 წელი მოანდომეს
რომი ერთ დღეში არ აშენებულა… და, რა თქმა უნდა, ერთ დღეში ვერც ასეთი ანიმაცია შეიქმნებოდა! “კორალაინი” სტოპ-მოუშენის ტექნიკითაა შესრულებული, რაც განსაკუთრებით ბევრ დროს მოითხოვს. თუ ოდესმე გიფიქრიათ იმაზე, თუ რატომ უშვებს სტუდია LAIKA ანიმაციურ ფილმებს ასე იშვიათად, აი, პასუხიც აქ არის!
3. ერთ-ერთი თანამშრომლის ფუნქცია მინიატურული სვიტრების მოქსოვა იყო
ალთეა ქრომი – ეს სწორედ ის ადამიანია, რომელმაც კორალაინის თოჯინას სვიტრები მოუქსოვა. დაგვეთანხმებით, ეს საკმაოდ რთული საქმეა, თუ თოჯინის ზომებს გავითვალისწინებთ – კორალაინის სიმაღლე 25 სანტიმეტრიც კი არ არის. წარმოიდგინეთ, რამდენად მინიატურული იქნებოდა მისი ტანისამოსი!
4. 2015 წელს “კორალაინის” ყველა თოჯინა აუქციონზე გაიყიდა
LAIKA-ს მიერ ორგანიზებულ აუქციონზე არა მხოლოდ “კორალაინის”, არამედ პარანორმანისა და მონსტრების ოჯახის თოჯინებიც იყო წარმოდგენილი. როგორც ცნობილია, სტუდიამ შემოსული თანხის დიდი ნაწილი არაკომერციულ ორგანიზაციას შესწირა, რომელიც ხელოვნებასა და შემოქმედებას სოციალური ცვლილებებისათვის ნერგავს.
5. ვაიბი ლოვატი წიგნის პერსონაჟი არ არის
ის ანიმაციაში ერთ-ერთ მთავარ როლს ასრულებს, თუმცა ვაიბის ნილ გეიმანის ნოველაში მას უბრალოდ მოიხსენიებენ… ვაიბი გაპერსონაჟებას, რა თქმა უნდა, სელიკს უნდა უმადლოდეს, რომელსაც სურდა, ფილმში კორალაინის თანატოლიც ყოფილიყო, რომელიც რეალურად ერთ-ერთ წამყვან ფიგურად იქცა.
6. რეალური სამყაროს გადასაღები მოედანი შედარებით ბრტყელი იყო, წარმოსახვითის კი – გაცილებით ღრმა
იმისათვის, რომ ალტერნატიულ სამყაროებს შორის განსხვავება კიდევ უფრო თვალშისაცემი გამხდარიყო, შემოქმედებითმა ჯგუფმა ასეთი გადაწყვეტილება მიიღო – მათ რეალობის ამსახველი გადასაღები მოედანი უკიდურესად ბრტყელი, ხოლო წარმოსახვითი სამყარო კი ბევრად უფრო ღრმა და მრავალგანზომილებიანი გახადეს. სწორედ ამიტომ, როდესაც ანიმაციას ვუყურებთ და კორალაინი გვირაბიდან ჯადოსნურ სამყაროში გადადის, გვიჩნდება შეგრძნება, თითქოს 3D ფილმს ვუყურებდეთ.
7. “კორალაინის” გახმოვანებაში მონაწილეობა რეჟისორის შვილებმაც მიიღეს
მათ, რა თქმა უნდა, ეპიზოდური პერსონაჟები გაახმოვანეს – კორალაინის მეგობარი მიჩიგანიდან, რომელიც გოგონას ფოტოსურათიდან ესაუბრებოდა და ბიჭი-მოჩვენება, რომელსაც ბელდამმა სიცოცხლე წაართვა.
ამის შემდეგ, ჰარისა და ჯორჯს კინოინდუსტრიასთან შეხება აღარ ჰქონიათ, თუმცა, დარწმუნებულები ვართ, ყოველთვის იამაყებენ, რომ მამის ერთ-ერთ საუკეთესო ნამუშევარში თავიანთი წვლილი მათაც მიუძღვით!
