არტურ კონან დოილის ნაწარმოებს უამრავი ეკრანიზაცია აქვს, თუმცა, მათ შორის, ერთ-ერთი გამორჩეული შერლოკია ბენედიქტ კამბერბეტჩისა და მარტინ ფრიმანის მონაწილეობით.
იქიდან გამომდინარე, რომ ჩვენი საყვარელი შოუს სიუჟეტი თანამედროვე ეპოქაში ვითარდება, დავინტერესდით, თუ კიდევ რა განსხვავებებს ვხვდებოდით ორიგინალ წიგნსა და ამ შესანიშნავ ეკრანიზაციას შორის.
მაშ ასე, განვიხილოთ პირველი ეპიზოდი “ვარდისფერი კვალი”, სადაც შერლოკ ჰოლმსი და ექიმი უოთსონი ერთმანეთს გაიცნობენ და “სერიული თვითმკვლელობების” გამოძიებაში ერთვებიან, ისევე როგორც მოთხრობაში “ალისფერი კვალი”:
1. წიგნში ის მხიარული, ექსცენტრიული, უზომოდ გულახდილი და სარკასტული პერსონაჟია, შოუში მას ყველა ეს თვისება გააჩნია მხიარულების გარდა და, უფრო მეტად, სოციოპათის ამპლუაში გვევლინება.
2. წიგნში ის არ ინტერესდება ისეთი თემებით, რაც მის საქმეს არაფერში წაადგება, შოუში კი შერლოკი სწავლობს ყველაფერს, რადგან მიიჩნევს, რომ ნებისმიერი ინფორმაცია რელევანტურია.
3. წიგნში შერლოკ ჰოლმსი უოთსონს ზრდილობიანად თხოვს, რომ ერთმანეთს საკუთარი შეცდომები გაუზიარონ, რათა მიხვდნენ, შეუძლიათ თუ არა თანაცხოვრება. შოუში კი შერლოკი თავად ჩამოთვლის უოთსონის ყველა ნაკლოვანებას, მას შემდეგ, რაც ეს უკანასკნელი აღნიშნავს, რომ ისინი ერთმანეთს არ იცნობენ და არ იციან, ერთად ცხოვრებას შეძლებენ თუ არა.
4. წიგნში მისტერ ლესტრეიდი აღწერილია, როგორც ვირთხისსახიანი ადამიანი, შოუში კი ეს პერსონაჟი სრულიად ნორმალურად გამოიყურება.
5. წიგნში საქორწინო ბეჭედი გარდაცვლილ ადამიანს ეჭირა, შოუში კი გარდაცვლილს ეკეთა.
6. წიგნში კედელზე სისხლით წერია “Rache”, რაც გერმანულ ენაზე შურისძიებას ნიშნავს, შოუში კი ეს სიტყვა იატაკზეა ამოკაწრული და გარდაცვლილი პერსონაჟის ქალიშვილის სახელია, რაც შემდგომში მისი ტელეფონის პაროლიც აღმოჩნდება. სხვათა შორის, სწორედ ამ მომენტში შერლოკი აღნიშნავს, რომ “შურისძიება” ძალიან მარტივი და გაცვეთილი მინიშნება იქნებოდა – ამ რეპლიკით ის, რა თქმა უნდა, ორიგინალ ნოველას აქილიკებს.
7. წიგნში მკვლელის მოტივი შურისძიებაა იმ გოგონას სიკვდილის გამო, რომელიც უყვარდა, თუმცა ძალით დააქორწინეს… შოუში კი, დეტექტივები “სერიულ თვითმკვლელობებზე” მუშაობენ, მანამ სანამ, არ შეიტყობენ, რომ თითოეული მსხვერპლი უბრალოდ საბედისწერო ტაქსიში ჩაჯდა…
8. წიგნში უოთსონის ოჯახის შესახებ ინფორმაციას შერლოკ ჰოლმსი მისი ჯიბის საათის საშუალებით ადგენს, შოუში კი მობილური ტელეფონით.
9. წიგნში გოგონას ლუსი, შოუში კი ჯენიფერი ერქვა.
10. წიგნში შერლოკს პოლიციელების დახმარება არ სურს, რადგან საბოლოოდ ქულებს ისინი დაიწერენ, შოუში კი ის სიამოვნებით ერთვება გამოძიებაში.
11. წიგნში მკვლელი დანაშაულის ადგილზე გამოჩნდება და თავს იკატუნებს, თითქოს მთვრალია. შოუში კი ის ტაქსის მძღოლის ამპლუაში გვევლინება და დარწმუნებულია, რომ ვერავინ შეამჩნევს.
12. წიგნში შერლოკი ნაპოვნი ბეჭდის შესახებ განცხადებას ავრცელებს და ელის, თუ ვინ გამოეხმაურება, შოუში კი ის ვოთსონის საშუალებით მკვლელს მოკლე ტექსტურ შეტყობინებას უგზავნის.
