ყველა შესანიშნავი ფილმი სავსეა სირთულეებით, რომელიც მთავარმა პერსონაჟმა უნდა გადალახოს. თუმცა, ეს სირთულეები ყოველთვის სცენარის ნაწილად როდი რჩება?! ზოგჯერ, მსახიობები გადასაღებ მოედანზე გაცილებით მეტ პრობლემას აწყდებიან… არის შემთხვევები, როდესაც რეჟისორები დარწმუნებულები არიან თავიანთ იდეაში, თუმცა ბევრი ბრძოლა უწევთ იმისთვის, რომ ფილმისათვის დაფინანსება მოიპოვონ.
ამ სტატიაში სწორედ 10 ყველაზე რთულად გადასაღებ ფილმს და მათთან დაკავშირებულ ისტორიებს:
1. უფსკრული
ჯეიმს კამერონს ჰოლივუდში “ყველაზე საშიშ კაცს” ეძახიან და ამის მიზეზი სრულიად საფუძვლიანია, რადგან უფსკრული ერთ-ერთი ყველაზე რთულად გადასაღები ფილმი აღმოჩნდა კინოს ისტორიაში. სამეცნიერო ფანტასტიკის უმეტეს ნაწილში მოქმედება წყალქვეშ ვითარდება, რაც, რა თქმა უნდა, განსაკუთრებულად ექსტრემალურ პირობებს ქმნიდა გადასაღებ მოედანზე.
როგორც ცნობილია, რეჟისორი მსახიობებისაგან ყვინთვის სერტიფიკატს მოითხოვდა, თუმცა თავად ერთ-ერთ კადრზე მუშაობისას კინაღამ დაიხრჩო.
2. გადარჩენილი
ფილმის სიუჟეტი რეალურ მოვლენებს ეფუძნება და მოგვითხრობს მამაკაცის შესახებ, რომელმაც განსაკუთრებით რთულ პირობებში სიცოცხლის შენარჩუნება შეძლო. როგორც აღმოჩნდა, “გადარჩენილის” გადასაღები მოედანი ზედმიწევნით იმეორებდა იმ სასტიკ გარემოს, რომელშიც მთავარ პერსონაჟს უწევდა ცხოვრება, რაც პირველ რიგში უკიდურეს სიცივეს გულისხმობდა.
გასაკვირი არ არის, რომ თანამშრომელთა გარკვეულმა ნაწილმა ამ ყოველივეს ვერ გაუძლო და გადაღებებს ადრეულ ეტაპზე გამოეთიშა.
3. აპოკალიფსი დღეს
ფრენსის ფორდ კოპოლას ლეგენდარულ ფილმს არაერთი სირთულე ახლდა თან. თავდაპირველად, მთავარი როლი ჰარვი კეიტელს უნდა შეესრულებინა, თუმცა ის მუშაობის დაწყებიდან 2 კვირაში გაათავისუფლეს და მარტინ შინით ჩაანაცვლეს, რომელსაც ალკოჰოლთან დაკავშირებული პრობლემები ჰქონდა.
გადასაღები მოედანი ფილიპინებში იყო და, როგორც ცნობილია, იქ სრული ქაოსი სუფევდა – ზოგს ტროპიკული ავადმყოფობა შეეყარა, კუნძულს რამდენჯერმე დაიფუნმა გადაუარა, იყო ადამიანებზე ვეფხვის თავდასხმის პრეცედენტიც… ამ ყოველივეს პარალელურად კი, თავისუფალ დროს მსახიობები ველურ წვეულებებს აწყობდნენ კოკაინის თანხლებით, რომლის ეპიცენტრშიც ვარსკვლავური დაავადებით შეპყრობილი მარლონ ბრანდო იყო.
4. ნათება
სტენლი კუბრიკის კლასიკად ქცეული ნამუშევრის გადაღებების შესახებ ნამდვილი ლეგენდები დადის. როგორც ცნობილია, რეჟისორი პერფექციონიზმით იყო შეპყრობილი, სწორედ ამიტომ დუბლებს იქამდე იღებდა, სანამ იდეალურ სცენას არ მიიღებდა… მაგალითად, ერთ-ერთი ყველაზე ცნობილი ეპიზოდის გადაღებას, სადაც ჯეკ ნიკოლსონი სააბაზანოს კარს ნაჯახით ამტვრევს, 3 დღე და 60-მდე ხის კარი დასჭირდა.
თავდაპირველი ჩანაფიქრით, ფილმის გადაღება 100 დღის განმავლობაში უნდა გაგრძელებულიყო, თუმცა კუბრიკის მსგავსი მიდგომიდან გამომდინარე ის თითქმის 9 თვემდე გაიწელა. ასეთ სტრესულ გარემოში კი შელი დიუვალს ფსიქიკური ჯანმრთელობა სერიოზულად დაუზიანდა.
5. ვარსკვლავური ომები
1970-იან წლებში სამეცნიერო ფანტასტიკა ნაკლებად პოპულარული ჟანრი იყო. ამ პერიოდში, ახალგაზრდა ჯორჯ ლუკასმა Universal-თან ხელშეკრულება ორი ფილმის გადასაღებად გააფორმა. მიუხედავად იმისა, რომ ამერიკული გრაფიტი საკმაოდ წარმატებული აღმოჩნდა, სტუდია მაინც თავს იკავებდა “ვარსკვლავური ომების” დაფინანსებისაგან. ამის მიზეზი, როგორც ზემოთ აღვნიშნეთ, არაპოპულარული ჟანრი იყო – მარკეტინგის გუნდი ფიქრობდა, რომ ისინი ფილმის გაყიდვას საერთოდ ვერ შეძლებდნენ.
საბედნიეროდ, რეჟისორი ძალიან ჯიუტი აღმოჩნდა, 20th Century Fox-ის პრეზიდენტი დაარწმუნა, რომ მის პროექტს დიდი მომავალი ჰქონდა და მისგან სრული მხარდაჭერაც მიიღო.
6. ტიტანიკი
ნამდვილად გაგვიკვირდებოდა, ჯეიმს კამერონი ამ ჩამონათვალში მეორედაც რომ არ მოხვედრილიყო. როგორც ცნობილია, რეჟისორი მსახიობების მიმართ დიდად მეგობრულობით არ გამოირჩეოდა, მათ ძალიან დიდხანს ამყოფებდა ცივ წყალში და როგორც ქეით უისნლეტმა აღნიშნა, მისთვის ძალიან ბევრი ფული უნდა შეეთავაზებინათ, რომ ჯეიმსთან ერთად კიდევ ემუშავა.
ამასთანავე, ტიტანიკის გადასაღებ მოედანზე კიდევ ერთი უსიამოვნო ინციდენტი მოხდა – სავარაუდოდ, ორმა მზარეულმა, რომლებიც სამსახურიდან გაათავისუფლეს, წვნიანში ნარკოტიკული საშუალება გაურიეს, რამაც 50-მდე ადამიანი მოწამლა.
7. წყლის სამყარო
ფილმის გადაღება ჰავაის ერთ-ერთ სანაპიროზე, პირდაპირ ღია ზღვაში მიმდინარეობდა. სამუშაო პროცესში შტორმი ძალიან ხშირი მოვლენა იყო, გადასაღები მოედნის მოწყობა კი, რა თქმა უნდა, დიდ თავის ტკივილად იქცა.
8. ოზის ჯადოქარი
შესაძლოა, ოზის ჯადოქარი ბევრი ბავშვის საყვარელი ფილმი იყოს, თუმცა მის გადასაღებ მოედანზე სასიამოვნო სამუშაო პირობები ნამდვილად არ ყოფილა: თუნუქის კაცის როლზე თავდაპირველად მსახიობი ბადი ებსენი დაამტკიცეს. მისი პერსონაჟისთვის განკუთვნილ ვერცხლისფერ გრიმს ალუმინის ფხვნილით ამზადებდნენ. გადაღებების დაწყებიდან 10 დღისა და ამ ხნის განმავლობაში ალუმინის ფხვნილის სუნთქვის გამო ებსენი დაავადდა. იგი სასწრაფოდ გადაიყვანეს საავადმყოფოში და რკინის მექანიკური ფილტვის დახმარებით აღუდგინეს სუნთქვა. მარგარეტ ჰამილტონს, რომელმაც მწვანეკანიანი და წაწვეტებულნიკაპიანი დასავლეთის ბოროტი კუდიანი დამაჯერებლად განასახიერა, კინაღამ შუა საუკუნეების ჯადოქრის ბედი ეწია. იმ სცენის გადაღებისას, როცა კუდიანი კვამლის ღრუბელში უნდა გაუჩინარდეს, სპეცეფექტების მანქანა მწყობრიდან გამოვიდა და გრიმისთვის გამოყენებული ზეთოვანი მწვანე საღებავი აალდა და მსახიობს ცეცხლი სხეულზე წაეკიდა.
ამასთანავე, გადასაღებ მოედანზე ტექნიკური მიზეზებით ძალიან ცხელოდა, რის გამოც გონება არაერთმა მსახიობმა დაკარგა. დაუმატეთ ამ ყოველივეს, სცენარისა და რეჟისორების ცვლილებაც – საკითხავია, საერთოდ როგორ მოხერხდა ფილმის დასრულება?!
9. უკან მომავალში
დღეს უკვე კლასიკად აღიარებულ ფილმს თავის დროზე გულშემატკივრები საერთოდ არ ჰყავდა. რობერტ ზემეკისმა 40 უარი მაინც მიიღო, მათ შორის დისნეისგანაც, რომელმაც სცენარში არსებული სიუჟეტი ინცესტს დაუკავშირა.
საბოლოოდ, ზემეკისმა სტივენ სპილბერგის საშუალებით Universal-ის დარწმუნება შეძლო.
10. ჩინური კვარტალი
გადასაღებ მოედნებზე დაპირისპირებები ძალიან ხშირია და ამ მხრივ გამონაკლისი არც “ჩინური კვარტალი” გამოდგა. როგორც ცნობილია, რომან პოლანსკი მთავარი როლის შემსრულებელ ფეი დანაუეის ძალიან უხეშად ექცეოდა, მას გამუდმებით უყვიროდა და ერთხელ საპირფარეშოში გასვლის ნებაც კი არ დართო. ამ ინციდენტის შემდეგ, გამწარებულმა მსახიობმა პირდაპირ ყავის ჭიქაში მოშარდა და შემდეგ შარდით სავსე ჭიქა რეჟისორს სახეში შეასხა.
