ამბობენ, რომ ნიჭიერი ადამიანები ყველაფერში ნიჭიერები არიან… ალბათ, სწორედ ამიტომ არაერთმა მუსიკოსმა გადაწყვიტა საკუთარი თავი სხვადასხვა სფეროში გამოეცადა – ზოგიერთი მათგანი დიზაინერი გახდა, ზოგიც რეჟისორი, თუმცა ყველაზე მეტმა მაინც სამსახიობო კარიერაში ბედის ცდა (და გამოუვიდათ კიდეც)
დღეს სწორედ იმ 10 მომღერალს წარმოგიდგენთ, რომლებმაც მუსიკის პარალელურად ძალები კინოშიც მოსინჯეს:
1. ჯენიფერ ლოპესი
შეიძლება ითქვას, რომ ჯენიფერი ისეთივე წარმატებული მსახიობია, როგორც მომღერალი… მის ანგარიშზე დაახლოებით 50-მდე ფილმია, მათ შორის რამდენიმე კი, როგორებიცაა ქორწილების ორგანიზატორი და მოახლე მანჰეტენიდან, მაყურებელში ძალიან დიდი პოპულარობით სარგებლობს.
2. ჯარედ ლეტო
Thirty seconds to Mars-ის ვოკალისტი ასევე ძალიან ნიჭიერი მსახიობი აღმოჩნდა. ამას მოწმობს ის ნომინაციები და ჯილდოები, რომელიც მან კინოკარიერის განმავლობაში მიიღო. მუსიკოსის ნამუშევრებიდან განსაკუთრებულად აღსანიშნავია ჯოკერი თვითმკვლელთა რაზმიდან და დალასის შემსყიდველთა კლუბი.
3. რიანა
ბარბადოსელი ლამაზმანი სულ ცოტა ხნის წინ ოუშენის რვა მეგობარში მოგვევლინა. მართალია, ეს მისი პირველი კინოროლი არ ყოფილა, თუმცა დარწმუნებულები ვართ, რომ მომავალში მას კიდევ უფრო ხშირად ვიხილავთ მსახიობის ამპლუაში.
4. სელენა გომესი
სელენა ჯერ კიდევ მოზარდი იყო, როდესაც სერიალებში თამაში დაიწყო, თუმცა საბოლოო ჯამში საკუთარი კარიერა მაინც მუსიკას დაუკავშირა. ამის მიუხედავად, სამსახიობო უნარ-ჩვევებიც არ დავიწყებია და დროდადრო ჩნდება ისეთ ფილმებში, როგორებიცაა გაქცევა და დიდი შემცირება.
5. მაილი საირუსი
უკანასკნელ წლებში მაილიმ ნამდვილად დაამტკიცა, რომ გარდასახვის საოცარი უნარი აქვს – მას შეუძლია იყოს ეპატაჟური, მგრძნობიარე, მომხიბვლელი და ა.შ. შესაბამისად, ის ხშირად გვევლინება სხვადასხვა ჟანრის ფილმებშიც, ხოლო სერიალში კრიზისი 6 სცენაში მონაწილეობის შემდეგ მან კრიტიკოსებისაგან საკმაოდ დადებითი შეფასებებიც დაიმსახურა.
6. ბიონსე
სამწუხაროდ, ბიონსე კინოს ნაკლებად წყალობს, თუმცა მის მიერ ოცნების გოგონებში განსახიერებული პერსონაჟი მაყურებლისათვის მართლაც დაუვიწყარია!
7. ლედი გაგა
მომღერალმა ჯერ კიდევ ამერიკული საშინელებათა ისტორიის საშუალებით დაგვარწმუნა საკუთარ ნიჭიერებაში, თუმცა მის სამსახიობო კარიერაში გარდამტეხი როლი მაინც ვარსკვლავის დაბადებამ ითამაშა.
8. შერი
ლეგენდარული მომღერალი 25-ზე მეტ ფილმშია გადაღებული და კინოსამყაროში არაერთი პრესტიჟული ჯილდოც აქვს მოპოვებული. უკანასკნელად მაყურებელს მისი ხილვის ბედნიერება მამა მიას მეორე ნაწილში ჰქონდა!
9. კრისტინა აგილერა
სწორედ შერის უკავშირდება კრისტინას პირველი და ძალიან შთამბეჭდავი გამოჩენა კინოში – 2010 წელს მომღერლებმა ერთად ითამაშეს მუსიკალურ დრამაში ბურლესკი, რომელმაც კინოკრიტიკოსებისაგან უმაღლესი შეფასებები და მაყურებლის დიდი სიყვარული დაიმსახურა!
10. ადამ ლევინი
Maroon 5-ის ვოკალისტის ნახვა ამერიკულ საშინელებათა ისტორიაში და რამდენიმე ფილმის ეპიზოდურ როლშია შესაძლებელი, თუმცა, იმედს ვიტოვებთ, რომ ის სამსახიობო კარიერას გააგრძელებს და კიდევ უფრო საინტერესო პერსონაჟებს შექმნის!
