ზოგჯერ ჩვენს საყვარელ ფილმებსა თუ სერიალებში ჩნდებიან გმირები, რომლებიც მაყურებლის ყურადღებას არა მხოლოდ ქარიზმითა თუ თვისებებით, არამედ ჩაცმის განუმეორებელი სტილითაც იპყრობენ.
შესაძლოა, ჩვენ ვერ მივცეთ საკუთარ თავს იმის ფუფუნება, რომ ჩაცმულობაზე ამდენი ფული დავხარჯოთ, თუმცა, ვფიქრობთ, რომ მათგან ინსპირაციის მიღება ნამდვილად შეიძლება:
1. ბაფი სამერსი – ბაფფი – ვამპირებზე მონადირე
ბაფის სტილი შესანიშნავად ასახავს 90-იანი წლების მოდას. პირველ სეზონებში მის გარდერობში ხშირად შევხვდებოდით მოკლე ქვედაბოლოებსა და მაღალქუსლიან ფეხსაცმელებს. მოგვიანებით ბაფიმ ყვავილებიანი პრინტიც შეიყვარა, თუმცა მისი შეუცვლელი სამოსი მაინც ტყავის შარვლები და ქურთუკები იყო.
2. ოდრი ჰორნი – ტვინ პიქსი
ოდრიმ პირველივე სერიიდან დაგვამახსოვრა თავი სტილის განუმეორებელი შეგრძნებით. მის გარდერობში აშკარად ჭარბობდა კუბოკრული ქვედაბოლოები, პრინტიანი ბლუზები, ქაშმირის ზედატანები… ამ ყველაფერთან ერთად კი აღსანიშნავია ოდრის მაკიაჟიც – მუქი წარბები, წითელი ტუჩები, გრძელი წამწამები და თითქმის შეუმჩნეველი თვალის ჩრდილები.
3. მარია ანტუანეტა
მართალია, კირსტენ დანსტის პერსონაჟის სტილი ჩვენი ყოველდღიურობისათვის ნამდვილად შეუსაბამოა, თუმცა, შეუძლებელია, არ მოვიხიბლოთ მისი გარდერობითა და იმ ფერებით, რომელსაც ახალგაზრდა დედოფალი იყენებს. ცისფერი, ვარდისფერი და კრემისფერი ტონალობები, ყვავილებიანი პრინტი, მაქმანებიანი ჩოკერები – ეს ყოველივე შესანიშნავად ერწყმის მის რომანტიკულ იმიჯს.
4. კოკო შანელი
ლეგენდარულმა კოკომ ქალებს მისცა ის, რაც მათ სჭირდებოდათ – არჩევანის თავისუფლება! ფილმის საშუალებით კი ჩვენ ვიხილეთ, თუ როგორ იქმნებოდა ეს ყოველივე: ჟილეტები, ტვიდის კოსტუმი, პატარა შავი კაბა!
5. ფიბი ჰოლიველი – მოჯადოებულნი
8 სეზონის განმავლობაში დებს შორის ყველაზე მეტად ფიბის გარეგნული მხარე შეიცვალა. პირველ ეტაპზე ის ნატურალურ მაკიაჟს, თავისუფალ მაისურებსა და სპორტულ სტილს ირჩევდა, მოგვიანებით კი მის გარდერობში გაჩნდა კორსეტები, მოკლე ტოპები, კიმონოები და ასიმეტრიული სამოსი. ის ერთნაირი წარმატებით ირგებდა როგორც რომანტიკულ, ასევე ძლიერი ქალის იმიჯს.
6. ქერი ბრედშოუ – სექსი დიდ ქალაქში
რა თქმა უნდა, ქერი ბრედშოუ არის პირველი, ვინც სტილსა და გარდერობზე გვახსენდება. მისი მთავარი საიდუმლო იმაში მდგომარეობს, რომ ქერი არ უშინდება ექსპერიმენტებსა და სიახლეებს. მას შეუძლია ერთმანეთს შეუხამოს სანდლები და ქურთუკი, თამამად მოირგოს გაზეთის გვერდებით დაპრინტული კაბა და ქამარი გაიკეთოს შიშველ მუცელზე.
7. ჰოლი გოლაიტლი – საუზმე ტიფანისთან
ჰოლის გარდერობში მოიძებნებოდა როგორც ბრენდული კაბები, ასევე ყოველდღიური სამოსიც, თუმცა ის ორივე მათგანში ძალიან ელეგანტურად გამოიყურებოდა. მიუხედავად იმისა, რომ ფილმის გადაღებიდან 50 წელზე მეტი გავიდა, შეიძლება ითქვას, რომ მისი სტილი დღემდე აქტუალურია და გოგონებს მისი მორგება დღესაც თავისუფლად შეუძლიათ.
8. მალენა
ფილმის დასაწყისში მალენას სამოსი შედარებით მოკრძალებულია, თუმცა ყურადღებას მაინც იპყრობს. ეს, რა თქმა უნდა, მონიკა ბელუჩის არაჩვეულებრივი გარეგნობის დამსახურებაა. მოგვიანებით მისმა პერსონაჟმა საკუთარი ფიგურა კიდევ უფრო გამოკვეთა, ქუსლები კიდევ უფრო აიმაღლა და სწორედ ასე იქცა ერთ-ერთ ყველაზე ქალურ გმირად კინოისტორიაში.
9. მირანდა პრისტლი – ეშმაკი ატარებს პრადას
მერილ სტრიპის პერსონაჟის სტილი შესანიშნავად გადმოგვცემს მის ხასიათს – მკაცრი პერფექციონისტი. ის უპირატესობას ანიჭებს ერთგვაროვან ტანისამოსს მკვეთრი აქცენტებით. რა თქმა უნდა, მირანდას გარდერობი ძალიან ძვირადღირებულია, თუმცა, ვფიქრობთ, რომ შესაბამისი ასაკის ქალები შესანიშნავად შეძლებენ მისი სტილის უფრო ხელმისწავდომ ფასებში მორგებას.
10. ჯულს ოსტინი – სტაჟიორი
ჯულსის გარდერობი იდეალურად ითავსებს ახალგაზრდულ და მოდურ ტენდენციებს. მის ჩაცმულობებში ხშირად ვხვდებით გამზადებულ რეცეპტებს თანამედროვე გოგონებისთვის. ჯულსი გვთავაზობს Must Have სამოსის ჩამონათვალსა და ერთმანეთისათვის იდეალურად მისადაგების მრავალფეროვან გზებს.
