როგორც უკვე იცით, დიდი პატარა ტყილები ტელეეკრანებს მეორე სეზონით უკვე დაუბრუნდა. დარწმუნებულები ვართ, წინ ძალიან საინტერესო და დაძაბული სეზონი გველის, თუმცა, მანამდე გთავაზობთ გავიხსენოთ ის ცხოვრებისეული გაკვეთილები, რაც შოუს მთავარმა პერსონაჟებმა ქალებისათვის დატოვეს (და ასეთი, დაგვეთანხმებით, ძალიან ბევრია):
1. ნუ მოიტყუებით
ვფიქრობთ, შოუს მთავარი იდეა სწორედ ამ მესიჯის გარშემო ერთიანდება. გავიხსენოთ, მედლინის ტყუილი თავის დაფარულ რომანზე ან სელესტი, რომელიც თავს ისე აჩვენებს, თითქოს იდეალური ოჯახი ჰყავს. ამ ორი მაგალითის გარდა, სერიალში არაერთ ფაქტს ვხვდებით, როდესაც მეგობრები, ოჯახის წევრები და პარტნიორები ერთმანეთს და, ხშირად, საკუთარ თავსაც კი ატყუებენ.
ამ ყოველივეს კი დადებითი შედეგი არასოდეს მოჰყვება. პირველ რიგში, ტყუილები ადამიანს შინაგანად გაანადგურებს, შემდეგ კი მის ცხოვრებასა და ურთიერთობებზეც ნეგატიურ გავლენას მოახდენს.
2. შეიძინეთ ახალი მეგობრები
ბავშვობაში, სკოლასა და სტუდენტურ წლებში ჩვენ ღია ვართ ახალი მეგობრების შესაძენად, თუმცა, ასაკის მატებასთან ერთად სულ უფრო ნაკლები დრო და ენერგია გვრჩება ასეთი ურთიერთობებისთვის.
სერიალში ნათლად ვხედავთ, რომ სელესტისა და მედლინის წრეში ჯეინის მიღების შემდეგ ყველაფერი იცვლება. თავიდან მათ დედობა და შვილებთან დაკავშირებული თემები აერთიანებთ, თუმცა, მოგვიანებით, ეს ყოველივე გაცილებით ღრმა და მნიშვნელოვან გრძნობაში გადაიზრდება!
3. მიჰყევით თქვენს ინტერესებს
თანამედროვე ქალების ცხოვრებაში ხშირად დგება მომენტი, როდესაც ისინი საკუთარი თავისთვის ვეღარ იცლიან – იქნება ეს ოჯახის ყოლა, მარტოხელა დედობა, კარიერული წინსვლა თუ ეს ყოველივე ერთად… არადა, თითოეული ადამიანისათვის ძალიან მნიშვნელოვანია თავისუფალი დროისა და ინტერესების ქონა.
სერიალში ამას პატარა ქლოეც კი აცნობიერებს. ასე რომ, აუცილებლად შეახსენეთ თქვენს თავს, თუ რისი კეთება მოგწონთ და ნუ იტყვით უარს ამ სიამოვნებაზე!
4. დაიცავით საკუთარი თავი
ცხოვრება უამრავ განსაცდელს გვიწყობს, თუმცა ყოველთვის უნდა შევეცადოთ, რომ ბედნიერები და ჯანმრთელები ვიყოთ! სელესტის მაგალითი გვიჩვენებს, რომ ეს მარტივი სულაც არ არის, თუმცა სასიცოცხლოდ მნიშვნელოვანია, რომ დავიცვათ თავი ფიზიკური თუ ემოციური განსაცდელებისაგან.
ნუ მისცემთ სხვებს უფლებას მიითვისონ მთელი თქვენი დრო და ენერგია. საჭირო მომენტებში ისწავლეთ უარის თქმა და საკუთარი თავის დაცვა!
5. ნუ გაექცევით პრობლემებს
დიახ, ამ სერიალში ჩვენ არაერთხელ ვნახეთ, თუ როგორ გაურბოდნენ პერსონაჟები საკუთარ პრობლემებს და იმის მომსწრეებიც გავხდით, რომ ამას კარგ შედეგამდე არავინ მიუყვანია.
გაქცევა გამოსავალი არასოდესაა – შესაძლოა, მან დროებით შვება მოგვგვაროს, თუმცა ის, რასაც გავურბივართ, აუცილებლად წამოგვეწევა! სწორედ ამიტომ, მნიშვნელოვანია ვისწავლოთ მათთან გამკლავება…
6. იყავით გულახდილი
როგორც უკვე აღვნიშნეთ, ტყუილი ადამიანებისათვის დამანგრეველია. შოუში არაერთხელ ვიხილეთ იმის მაგალითი, თუ როგორ გაუმჯობესდა ყველაფერი მას შემდეგ, რაც პერსონაჟები ერთმანეთთან გაიხსნენ – გავიხსენოთ, თუნდაც მედლინის ურთიერთობა თავის ქალიშვილთან.
ხშირად ჩვენს გრძნობებსა და ემოციებზე საუბარი ახლობელ ადამიანებთან მათთან რეალური კავშირის შენარჩუნების ერთადერთი გზაა.
7. არ დანებდეთ
ცხოვრება ყოველთვის ისე არ ვითარდება, როგორც ჩვენ წარმოგვედგინა. ამ გზაზე ძალიან ბევრ სირთულეს ვაწყდებით და ზოგჯერ დანებების გარდა სხვა გამოსავალს ვერც კი ვხედავთ.
რეალურად კი, ეს ყველაზე ცუდი გადაწყვეტილებაა – გავიხსენოთ ჯეინის მაგალითი, რომლის შვილსაც მჩაგვრელობაში ადანაშაულებდნენ და რომელმაც ბოლომდე იბრძოლა მისი სიმართლის დასამტკიცებლად.
8. მიიღეთ ის, რისი შეცვლაც არ შეგიძლიათ
ზემოთ აღნიშნული პუნქტის მიუხედავად, არის მოვლენები, რომელთა გაკონტროლებაც უბრალოდ შეუძლებელია. მედლინი ვერაფრით ეგუებოდა იმ ფაქტს, რომ მისი ყოფილი ქმარი მოულოდნელად მზრუნველი მამის როლში მოევლინა.
ვფიქრობთ, ის თავს გაცილებით უკეთ იგრძნობდა, ეს ყოველივე ჩვეულებრივად რომ მიეღო და წარსულზე არ ჩაციკლულიყო. ზოგჯერ, უბრალოდ, საჭიროა დავიცალოთ ნეგატიური აზრებისაგან და ცხოვრება გავაგრძელოთ!
9. მოუსმინეთ სხვებს
კიდევ ერთხელ გავიხსენოთ მედლინისა და მისი ქალიშვილის ურთიერთობა. მათ შორის ძალიან დიდი ბზარი გაჩნდა, რადგან მედლინი აბიგაილს უბრალოდ არ უსმენდა. მაყურებელი ხშირად ხედავდა, თუ როგორ კამათობდნენ ისინი.
არადა, ძალიან მნიშვნელოვანია მოვუსმინოთ და გავუგოთ ჩვენს საყვარელ ადამიანებს – ეს დადებითად იმოქმედებს როგორც ჩვენს ურთიერთობებზე, ასევე პიროვნულ ზრდასა და განვითარებაზეც!
10. იყავით კარგი მეგობარი
მეგობრობა დიდი პატარა ტყუილების ერთ-ერთი მთავარი თემაა! სხვადასხვა ეტაპზე შეძენილი ეს ადამიანები ძალიან მნიშვნელოვან როლს თამაშობენ ჩვენს ცხოვრებაში – ისინი გვისმენენ, გვიცავენ, გვერდით გვიდგანან და გვაძლევენ იმას, რაც გვჭირდება.
შოუს საშუალებით, ჩვენ კიდევ ერთხელ დავრწმუნდით, თუ რამხელა ძალა აქვს მეგობრობას და რამდენად მნიშვნელოვანია, რომ ქალები ერთმანეთის მიმართ სოლიდარულები იყვნენ!
