ნეტავ რას მივიღებთ, თუ John Wick-ის ფრანჩიზას, დაუმატებთ „Kill Bill“-ს, გემოვნებისამებრ მოვაყრით ცოტა „The Ghost“-ს, სიცხარისათვის ჩავაყრით „Mighty Joe“-ს, დავატკბოთ ცოტაოდენი ფენტეზით, შემდეგ ამ ყველაფერს მაღალი ხარისხის ანიმაციად მოვზელთ და საბოლოოდ მარველის სამყაროში გამოვაცხობთ… ჩვენც თავიდან მსგავსად ვიფიქრეთ – არაფერს კარგს, თუმცა დისნეიმ და ჰულუმ განსხვავებულად იფიქრეს, თანაც ორიგინალ წყაროდ მარველის კომიქსები აიღეს, შედეგად კი „Hit Monkey“-ის (მკვლელი მაიმუნი) ანიმაციური ტელეშოუ მივიღეთ, რომლის თრეილერსაც ზუსტად ამ წამს გთავაზობთ:
როგორც თრეილერიდან ხედავთ, თავდაპირველად მოქმედება დაქირავებული მკვლელის, ბრაისის (ჯეისონ სუდეიკისი) ირგვლივ ვითარდება, რომელიც, ჯერ-ჯერობით დაუდგენელი დავალებით იაპონიას სტუმრობს. ჩვენსთვის ამ წუთისათვის უცნობი მიზეზით ბოროტმოქმედები კლავენ ბრაისის, ასევე როგორც იაპონიის ალპებში მცხოვრებ თეთრი მაკაკების პაპიონინს (მაკაკების ტომი). ერთ-ერთი გადარჩენილი პრიმატი, ადამიანების სისასტიკის შემყურე გადაწყვეტს შური იძიოს მისი ტომის გენოციდში დამნაშავე ადამიანებზე. შურისძიებას მოწყურებული მაიმუნი დაქირავებული მკვლელის, ბრაისის აჩრდილთან ერთად ხანგრძლივ მოგზაურობაში მიემართება, სადაც ეცდება ისწავლოს ბრძოლის ხელოვნება, ხოლო შეძენილი უნარებით სამუდამო ძილს მისცეს ყველა დამნაშავე ადამიანი.
Star Trek– ის ლეგენდა ჯორჯ ტაკი გაახმოვანებს შინჯის, არაჩვეულებრივად წესიერ პოლიტიკოსს, რომელიც იბრძვის იაპონიის მომავალი პრემიერ მინისტრის თანამდებობაზე, ხოლო მისი დისშვილი, აკიკო („იქს ადამიანები: აპოკალიფსის“ ვარსკვლავი ოლივია მუნი) – ყველაზე სანდო პოლიტიკური მრჩეველია. ჰარუკა (ალი მაკი) და იტო (ნობი ნაკანიში) ტოკიოს პოლიციელები არიან, რომლებსაც სურთ კორუფციის აღმოფხვრა, თუმცა არაერთი გამოწვევისა და სირთულის წინაშე დგანან. ჰარუკა იდეალისტი ახალბედაა, ხოლო იტო ალკოჰოლის მოყვარული ვეტერანი, რომელსაც განყოფილებაში ძალიან ცოტა მეგობარი ჰყავს. ისინი ხვდებიან, რომ დიდი ალბათობით მაიმუნს დაუჭერენ მხარს და დაეხმარებიან. თავად პროტაგონისტს, მაიმუნის მსახიობი ფრედ ტატასკიორე ახმოვანებსა, რომელიც პერსონაჯებთან მაიმუნების ენაზე საუბრობს.
შეგახსენებთ, რომ Hit-Monkey-ის დებიუტი 2010 წელს, ამავე დასახელების კომიქსში შედგა და მას შემდეგ მისი ნახვა სხვადასხვა მარველის კომიქსებში იყო შესაძლებელი.უნდა ითქვას, რომ წინ საკმაოდ უცნაური ისტორია გველის, რომელიც ანტრომორფული მაკაკის ადამიანების სისხლში ბანაობას გვპირდება. აქვე აღსანიშნავია, რომ ანიმაციურ სერიალს აუცილებლად „R“ რეიტინგი ექნება, რაც ერთი შეხედვით მარველისა და დისნეის „უყურე ოჯახთან ერთად“ პოლიტიკას ეწინააღმდეგება. ამიტომაც შოუ „Disney+“-ის ნაცვლად ექსკლუზიურად Hulu-ზე ამავე წლის 17 ნოემბრიდან გავა.
აქვე დავამატებთ, რომ თავდაპირველად შოუ 2019 წელს იყო დაგეგმილი, რომელსაც „M.O.D.O.K.“-თან, „Howard Duck“-თან და „Tigra & Dazzler“-თან ერთგვარი კროსოვერი, სახელად „The Offenders“ უნდა შეექმნა. როგორც შემდგომ The Hollywood Reporter-მა განაცხადა „Howard the Duck“ და „Tigra and Dazzler“ გაურკვეველი მიზეზით გაუქმდა, თუმცა რადგან უცნაური იხვი მარველის „What If?…“-ში ვიხილეთ შესაძლოა არსებობს იმედი იმისა, რომ ხსენებული შოუები ადრე თუ გვიან მაინც გამოვა, მანამდე კი შეგვიძლია პაცეფისტი მაკაკის ისტორიით დავტკბეთ, რომელიც აიძულეს, რომ მკვლელი გამხდარიყო.
