გილბერტ გოთფრიდს არასოდეს მიუღია მონაწილეობა წამყვან როლში და საოჯახო ფილმებსა და კომედიებში ყოველთვის მეორეხარისხოვანი პერსონაჟების განსახიერებით იყო დაკავებული. გილბერტ გოთფრიდი 80-90-იანი წლების ერთ-ერთი ყველაზე ცნობილი კომიკოსია, ლესლი ნილსონის, როუენ ატკინსონისა და სხვა ცნობილი კომიკოსების გვერდით. დარწმუნებით შეიძლება ითქვას, რომ ქართველი მაყურებლისათვის ხსენებული სახელი და გვარი ბევრს არაფერს ამბობს, თუმცა როგორც კი მის ხმას მოისმენთ, მომენტალურად გაგახსენდებათ უამრავი ფილმი, სადაც მსახიობი მუდმივად გაბრაზებულ, თვითკმაყოფილ, წვრილი ჩახლეწილი ხმით მოსაუბრე პერსონაჟს ასახიერებდა და გაგეცინებათ კიდეც… Sidney Bernstein „Beverly Hills Cop II”-ში, Mr. Peabody „Problem Child”-ის სამივე ფილმში და რა თქმა უნდა იაგო „Aladdin“-ში.
სამწუხარო ის არის, რომ გილბერტი დღეს დილით გარდაიცვალა. ამის შესახებ მისმა ოჯახმა მსახიობის Twitter-ის გვერდზე დაწერა. ოჯახი წერს, რომ მსახიობი საკმაოდ დიდი ხნის მანძილზე ავადმყოფობდა და საბოლოოდ გულის უკმარისობით გარდაიცვალა. ის 67 წლის იყო.
