კრის ევანსი, დენიელ კრეიგი, კრისტოფერ პლამერი, ანა დე არმასი, დონ ჯონსონი, ჯემი ლი კერტისი, ტონი კოლეტი და მაიკლ შანონი ეს ის „A“ კლასის სამსახიობო გუნდია, რომელიც რაიან ჯონსონის ახალ კომედიურ დეტექტივში, „Knives Out“-ში იღებს მონაწილეობას. იმის გარდა, რომ ფილმი მეგა ვარსკვლავებით არის დაკომპლექტებული, სურათის რეჟისორიც მოწოდების სიმაღლეზეა. რაიან ჯონსონის ბოლო ნამუშევარი „Star Wars: The Last Jedi“-ია, რომელმაც საკმაოდ კარგი შეფასებები მიიღო და მსოფლიოს მასშტაბით 1.4 მილიარდი აშშ დოლარის შემოსავალი მიიღო.
სამსახიობო გუნდი
შეგახსენებთ, რომ „Knives Out“-ის კინოთეატრებში გაშუქება გასული წლის 27 ნოემბერს დაიწყო, თუმცა მისი ნახვა საზოგადოების ვიწრო წრეებისთვის 09.09.2019-დან „TIFF“-ზე (ტორონტოს საერთაშორისო კინოფესტივალი) იყო შესაძლებელი. მოგვიანებით სურათი ბელგიასა და აშშ-ში სხვადასხვა კინოფესტივალებზე რამდენჯერმე გაშუქდა და კვლავ მისი ნახვა მხოლოდ ფოკუს ჯგუფმა და კრიტიკოსებმა მოახერხეს. სურათმა მომენტალურ წარმატებას მიაღწია, როდესაც „Rotten Tomatoes“-ზე კრიტიკოსების 97%, ხოლო მაყურებლის 92% შეფასება მომენტალურად მიიღო. ასევე, „დამპალი პომიდორის“ შეფასებას არაფრით ჩამოუვარდებს „IMDB“ და ფილმს მაყურებელი 7.2 „★“-ს ანიჭებს.
ფილმში მოვლენები კლასიკური მკვლელობისა და მისი გამოძიების ირგვლივ განვითარდება. მხოლოდ ამ ფაქტის ცოდნაც კი საკმარისია იმისათვის, რომ ჩართო ფილმი, კომფორტულად მოკალათდე, მოიმაროგო ბლომად პოპკორნი სასმელთან ერთად და „ჩაუჯდე“ ნამდვილ გამოძიებას. ფილმი, გავმეორდები და ნამდვილად გასაოცარია, სასაცილო, დამაინტრიგებელი, ლამაზი და კმაყოფილების მომგვრელი. სურათი 130 წუთი გრძელდება, მაგრამ არც ერთი წამით არ გაძლევს მოდუნების საშუალებას. რაიანი საკმაოდ ეფექტურად ახერხებს ისტორიის მოწოდებას, სადაც სიმართლის გაგება ფილმის დასასრულამდე აბსოლუტურად შეუძლებელი ხდება. „Knives Out“ საკმაოდ ჭკვიანი და ამასთან ერთად, გასართობი ფილმია, რომელიც აბსოლუტურად ყველას მოეწონება.
ფილმში მოვლენები ცნობილი მწერლის, ჰარლან ტრომბეის (კისტოფერ პლამერი) სიკვდილით იწყება, რომელიც საკუთარ სახლში, 85-ე დაბადების დღის შემდეგ გარდაცვლილი იპოვეს. გარდაცვლილი მწერლის ახლობლებისა და ოჯახის წევრების ტყუილების ქსელში გახლართული დეტექტივი ბენოიტ ბლანი (დენიელ კრეიგი), ეცდება გაარკვიოს, თუ რა გახდა ცნობილი მწერლის გარდაცვალების მიზეზი.
