კანის კინოფესტივალი ყოველთვის იყო, არის და იმედია იქნება ის ადგილი, სადაც ნებისმიერი გემოვნების კინომოყვარული აუცილებლად მიაგნებს სასურველ ფილმს.
კინორეჟისორებისთვის კი ფრანგული რივიერა ერთგვარი ტრამპლინია და, თუ ისტორიას გადავხედავთ, აღმოვაჩენთ, რომ აქ ბევრი რეჟისორის კარიერა შეიქმნა.
კანში ბევრი რეჟისორის ტრიუმფისა და დაცემის მომსწრენი გავხდით. თუმცა, ხშირად ოქროს პალმის რტოს მფლობელი ფილმები კინოს ისტორიაში სამუდამოს იმკვიდრებენ ადგილს და სამუდამოდ რჩებიან მახსოვრობაში.
კანის ისტორიას ასეთი ბევრი ფილმი აქვს, თუმცა დღეს თერთმეტ მათგანს გავიხსენებთ.
The Umbrellas of Cherbourg
ჟაკ დემის ფილმი, არაჩვეულებრივი კატრინ დენევის მონაწილეობითა და მიშელ ლეგრანის დაუვიწყარი მუსიკით, ოქროს პალმის რტოს გარდა, ოსკარის ხუთ ნომინაციაზე იყო წარდგენილი. დრომ ფილმის პოპულარობას ვერაფერი დააკლო და ის დღემდე რჩება კინოსამყაროს ერთ-ერთ საუკეთესო მიუზიკლად.
Blue Is the Warmest Color
აბდელატიფ კეშიშის დრამა ჟული მაროჰის გრაფიკული ნოველის მიხედვით შეიქმნა და არაჩვეულებრივი მსახიობების, ლეა სეიდუსა და ადელ ეგზარქოპულოსის თამაშის წყალობით, მალევე იქცა კინოჰიტად. ფილმი ოქროს გლობუსისა და ბაფტას ჯილდოებზეც წარადგინეს და მართალია, ეს პრიზები ვერ მიიღეს, თუმცა, საყოველთაო ყურადღების ცენტრში მოექცა.
Black Orpheus
ფერების, მუსიკისა და რიო დე ჟანეიროს არაჩვეულებრივი ატმოსფეროს არაჩვეულებრივი სინთეზით შექმნა მარსელ კამუსმა “შავი ორფეუსი”. რიოს ფაველებში განვითარებული ამბავი, რომელიც ბერძნული მითებით არის გაჟღენთილი, მალევე გახდა წარმატებული სურათი და პალმის გარდა, საუკეთესო უცხოენოვანი ფილმის ნომინაციაში ოსკარიც დაიმსახურა.
Paris, Texas
თუ რამეს შეიძლება კინემატოგრაფიული შედევრი ვუწოდოთ, ერთ-ერთი ნამდვილად არის ვიმ ვენდერსის პარიზი, ტეხასი. ნასტანსია კინსკის შეუდარებელი თამაში და რაი კუდერის მუსიკა, სრულიად გითრევს ფილმის ატმოსფეროში და სურათის დასრულების შემდეგაც კი, შეუძლებელს ხდის აზრებს თავი მოუყარო.
The Piano
ჯეინ კამპიონის ეს ლიტერატურული ფილმი მეცხრამეტე საუკუნეში მომხდარ დაუვიწყარ ისტორიას მოგვითხრობს. ამბავი პიანინოზე, რომელიც ფეტიშიზმისა და ეროტიკის სიმბოლოდ იქცა, კანში დააფასეს და პალმის რტოც გადასცეს. ფრანგული რივიერის გარდა, ფილმი ოკეანის გადაღამაც შეიმჩნიეს და საბოლოოდ, სამი ოსკარი მისცეს. მათ შორის ჰოლი ჰანტერს – საუკეთესო მსახიობი ქალის ნომინაციაში.
Pulp Fiction
შეუძლებელია კანის კინოკლასიკაზე ისაუბრო და არ ახსენო კვენტინ ტარანტინოს Pulp Fiction. გარდა იმისა, რომ ფილმი არაერთი პრესტჟული ჯილდოს მფლობელი გახდა და კომერციულ ჰიტად იქცა, თამამად შეიძლება იმის თქმა, რომ სწორედ ამ ფილმმა განსაზღვრა ტარანტინოს წარმატებული კარიერა.
Viridiana
სილვია პინალის მიერ განსახიერებული “ვირიდიანა”, სამუდამოდ დარჩება არამხოლოდ კანის, არამედ მსოფლიო კინოს ისტორიაში. ბუნუელის ნამუშევარი ერთ-ერთი საუკეთესო ნიმუშია იმისა, თუ რა საფასურის გადახდა უწევთ ადამიანებს აკრძალული ვნებებისა და სასიყვარულო თააშებისთვის. ფილმს ლაიტმოტივად გასდევს იმ დროინდელ ესპანეთსა და მექსიკაში მომდარი პოლიტიკური ვითარებაც და ამდენი წლის შემდეგაც არ კარგავს აქტუალობას.
The White Ribbon
ავსტრიელი მიჰაელ ჰანეკესთვის კანი და ოქროს პალმის რტო უცხო ნამდვილად არ არის — რეჟისორმა ეს უდიდესი ჯილდო ორჯერ მიიღო. ფილმის სიუჟეტი გერმანიაში, პირველი მსოფლიო ომის დასრულებიდან ერთი წლის შემდეგ ვითარდება და ჰანეკე, ტრადიციულად, ამ ფილმშიც ძალიან ღრმა, საინტერესო და მნიშვნელოვნ აქცენტებს აკეთებს.
Taxi Driver
1976 წელს, მარტინ სკორსეზეს ფილმი რობერტ დე ნიროს, დიანე აბოტისა და ჯოდი ფოსტერის მონაწილეობით, ნამდვილ სენსაციად იქცა. კინოსურათი ისეთ მნიშვნელოვან თემებს ეხება, როგორიც არის მიზოგენია, შიში და სისასტიკე. ფილმმა პალმის რტოს გარდა ოსკარისა და ოქროს გლობუსის ნომინაციებიც მიიღო.
4 Months, 3 Weeks and 2 Days
კრისტიან მუნჯიუმ მოახერხა და რუმინული კინო ახალ საფეხურზე აიყვანა. ამის ერთ-ერთი მაგალითია “4 თვე, 3 კვირა და 2 დღე”. ფილმმა ოქროს პალმის რტო მიიღო, თუმცა, ასეც რომ არ მომხდარიყო, თამამად შეიძლება იმის თქმა, რომ ის აუცილებლად დარჩებოდა კინოისტორიაში ერთ-ერთი ყველაზე აქტუალური, აბორტის თემის ასეთი განხილვისა და ჩვენებისთვის.
წეროები მიფრინავენ
მიხეილ კალატოზოვის “მიფრინავენ წეროებს” საფუძვლად უდევს ვიქტორ როზოვის ამავე სახელწოდების პიესა. სურათის სიუჟეტი მეორე მსოფლიო ომის დროს ვითარდება, მთავარ როლს კი ტატიანა სამოილოვა ასრულებს, რომელიც ვერონიკას პერსონაჟის განსახიერების შემდეგ, საბჭოთა კინოს ვარსკვლავად იქცა.
