ამ კვირას კინოაკადემიის დაჯილდოებას 30 წლის შემდეგ პირველად არ ეყოლება წამყვანი. ოსკარის ჰოსტის პოზიციაზე ამერიკელი კომიკოსი კევინ ჰარტი იყო დამტკიცებული, თუმცა მის ჰომოფობიურ პოსტებთან დაკავშირებული სკანდალის შემდეგ მან წამყვანობაზე უარი განაცხადა. ჯერჯერობით უცნობია, რამდენად იმოქმედებს ოსკარების დაჯილდოების ისედაც დაცემულ რეიტინგზე ეს ფაქტი, თუმცა საინტერესოა გავიხსენოთ, რა მოხდა ცერემონიალზე ბოლოს, როცა მას წამყვანი არ ჰყავდა.
1989 წლის დაჯილდოებას, რომელიც წამყვანის გარეშე ჩატარდა, ბევრმა “საშინელი” უწოდა და მას იმ წლის მთავარი პროდიუსერის კარიერა შეეწირა. 30 წლის შემდეგ, BBC-მ ეს ცერემონიალი გაიხსენა და ნაბიჯ-ნაბიჯ მიჰყვა შოუს, რომელმაც თავის დროზე დიდი აჟიოტაჟი გამოიწვია.
უპირველეს ყოვლისა, ვნახოთ ვიდეო სახელწოდებით “11 წუთი, რომელმაც სამუდამოდ გააცამტვერა ჰოლივუდის პროდიუსერის ალან კარის კარიერა”
შოუ გაიხსნა საგანგებო ნომრით, რომლის მთავარი გმირიც ფიფქია გახლდათ (მას მსახიობი ეილინ ბოუმენი განასახიერებდა ყურისმომჭრელი ფალცეტით). ფიფქია მღეროდა პაროდიულ სიმღერას ჰოლივუდის ყველაზე კაშკაშა ვარსკვლავებზე, რომლებიც აშკარად არ ჩანდნენ ნასიამოვნები, როცა მათ დისნეის პრინცესა უახლოვდებოდათ. შოუ ეშხში შევიდა და საუბედუროდ, კიდევ უფრო გაუსაძლისი გახდა.“ფიფქია სცენაზე ავიდა და ფარდაც აიწია – მაგრამ მის მიღმა კაფე-ბუნგალო და მისი “მოცეკვავე ქოქოსების ფართი” ვიხილეთ” – წერს BBC.”
ეს რაღაც წამლის ზემოქმედების ქვეშ შექმნილი ფანტაზიაა ჰოლივუდის ოქროს ხანიდან. შემდეგ გამოდის რობ ლოუ და შოუ მეტი სიმღერით გრძელდება (ცეკვაც ბევრია – მას საღამოს კაბებსა და კოსტიუმებში გამოწყობილი გოგო-ბიჭები, ჰოლივუდის ძველი ვარსკვლავები და მაგიდაგადაცმული მოცეკვავეები ასრულებენ).
ეს უხერხულობამდე სასაცილო პაროდია, რომლის თვალის დევნებაც, როგორც ამბობდნენ, “ფიზიკურად აუტანელი” იყო, დაახლოებით 12 წუთს გაგრძელდა და ბოლოს, როგორც იქნა, პირველი წამყვანი გამოჩნდა.
ადამიანები, ვინც ამ ცერემონიას თვალი პირდაპირ ეთერში ადევნა, იხსენებენ, რომ ყველაზე უარესი ის იყო, რომ ნომერი ძალიან დიდხანს გაგრძელდა. “4 წუთს ამ საშინელებაზე უხერხულად გეცინებოდა, 6 წუთი უკვე ზედმეტი გეჩვენებოდა, 12 წუთი კი უბრალოდ გაუსაძლისი აღმოჩნდა.”
საბოლოოდ, 1989 წლის ოსკარების დაჯილდოებას რამდენიმე სკანდალი მოჰყვა. ჰოლივუდის ლეგენდებმა – ჯული ენდრიუსმა, პოლ ნიუმენმა და ბილი უაილდერმა საგანგებო წერილში გაკიცხეს გამხსნელი ნომერი და მას “როგორც აკადემიის, ასევე მთელი კინოინდუსტრიის სირცხვილი” უწოდეს. ცერემონიალის პროდიუსერი ალან კარის კარიერა ამ ნომრის შემდეგ დაეცა, დისნეიმ საჩივარი შეიტანა თავისი გმირის გაშარჟებისთვის, ხოლო ამ ყველაფერმა აკადემია გვარიანად შეანჯღრია და მთელი მომდევნო დეკადა ოსკარის წამყვანებად ერთმანეთს ბილი კრისტალი და ვუპი გოლდბერგი ენაცვლებოდნენ.
დღეს ამ ნომერს მაყურებელი გაცილებით მოწყალედ უყურებს და მეტიც, მიაჩნიათ, რომ ის ძალიან სასაცილოა. თუმცა აკადემია ფრთხილად უნდა მიუდგეს ოსკარების ცერემონიალის მასპინძლის გარეშე ჩატარებას და 1989 წლის ნომრებივით არ გადაამლაშოს, თორემ მეტისმეტი მონდომებისგან შეიძლება უკუშედეგი მიიღოს, თან, ნუ დაგვავიწყდება – ინტერნეტმემეების დაუნდობელი ეპოქა ასეთ შესანიშნავ მასალას ხელიდან არ გაუშვებს.
