სულ ცოტა ხნის წინ გამოვლინდა ოსკარების 90-ე ცერემონიალის გამარჯვებულები. საუკეთესო მსახიობი ქალის ნომინაციაში სრულიად დამსახურებულად გაიმარჯვა ფრენსის მაკდორმანდმა. მან გამარჯვებულის სამადლობელი სიტყვის წარმოთქმისას დოლბის დარბაზში მყოფ ყველა ნომინირებულ ქალს ფეხზე წამოდგომისკენ მოუწოდა და ამით როგორც ჰოლივუდის, ისე მსოფლიოს ქალებს სრული მხარდაჭერა და თანადგომა გამოუცხადა. გასულ წელს ქალების სექსუალური შევიწროების საკითხის გარშემო ატეხილი სკანდალების ფონზე წლის საუკეთესო მსახიობმა გადაწყვიტა, უფრო დაწვრილებით შეხებოდა ქალებისთვის მნიშვნელოვან და აქტუალურ თემებს.
“დიდი პატივი იქნება ჩემთვის, თუ ნებისმიერ კატეგორიაში ნომინირებული ყველა ქალი ჩემთან ერთად იდგება”, – წარმოთქვა სცენიდან მსახიობმა და ხელების მოძრაობით მოუწოდა ქალებს ფეხზე წამოდგომისკენ, – “მსახიობები… რეჟისორები, პროდიუსერები, სცენარის ავტორები, კომპოზიტორები, სიმღერის ავტორები, დიზაინერები… მიდით!”
როცა დარბაზში მყოფმა ქალებმა მისი მოწოდება გაითვალისწინეს და ფეხზე წამოდგნენ, მაკდორმანდმა მერილ სტრიპს მიმართა და ქალების წარმატების მაგალითად მოიხსენია ის. “თუ შენ შეძელი, ყველა დანარჩენიც შეძლებს”, თქვა მან.
თუმცა მან ხაზი იმასაც გაუსვა, რომ ჰოლივუდი ქალებს საკმარისად არ ეხმარება, რადგან მათ პროექტებს ხშირად სინანსურ და სხვაგვარ მხარდაჭერას არ უცხადებს. “მიმოიხედეთ, ქალბატონებო და ბატონებო – აქ მყოფთაგან ყველას გაგვაჩნია ჩვენი ამბები და პროექტები, რომლებსაც დაფინანსება სჭირდება. და მოდით, ამ საღამოს დაინტერესებულ მხარეებზე ნუ ვისაუბრებთ. უბრალოდ, რამდენიმე ხანში მიგვიწვიეთ თქვენს ოფისებში, ან ჩვენსაში მობრძანდით, როგორც გირჩევნიათ… და ყველაფერს მოგიყვებით”.
თავისი გამოსვლა მსახიობმა მოულოდნელი სიტყვებით დაასრულა: “ორი სიტყვით მინდა დაგტოვოთ: ეტლით მოსარგებლე“.
ამ ფრაზამ მსოფლიო მაყურებელი, რომელიც ცერემონიალს ინტერნეტით ადევნებდა თვალს, დააბნია, მაგრამ ჰოლივუდისთვის ნათელია, რასაც გულისხმობდა მაკდორმანდი: ესაა ჰოლივუდურ ხელშეკრულებებში არსებული ერთ-ერთი მუხლი სპეციალურად განსაკუთრებული საჭიროების მქონე ადამიანებისთვის. ამ სიტყვებით მსახიობმა მიანიშნა იმაზე, რომ ჰოლივუდის გავლენიანმა ხალხმა მეტი ყურადღება უნდა მიაქციოს გენდერულ, რასობრივ და სხვაგვარად განსხვავებული ტალანტების ჩართულობას პროექტებში.
ჰოლივუდის ტრიბუნიდან ამ შთამბეჭდავი სიტყვით ფრენსის მაკდორმანდმა არამარტო ქალებს გამოუცხადა სრული მხარდაჭერა, არამედ ჰოლივუდის გავლენიანი პირების ყურადღება გაამახვილა მათთვის მეტი ადგილის დათმობაზე, ასევე შეზღუდული შესაძლებლობის მქონე პირების მიმართაც გამოხატა თანადგომა, რომელთა ტალანტსაც ხშირად იგნორირებას უკეთებენ ან სათანადოდ არ იყენებენ. ყველა იმედოვნებს, რომ წლის საუკეთესო მსახიობი ქალის ნათქვამი, რომელიც მან გამარჯვებულის ტრიბუნიდან გაცვეთილი სამადლობელი სიტყვების ნაცვლად გააჟღერა, სასიკეთო გავლენას მოახდენს როგორც ჰოლივუდის პოლიტიკის შეცვლაზე, ისევე ქალების მიმართ დამოკიდებულებაზე.
იხილეთ მისი სიტყვა სრულად:
