სექსუალური განათლება Netflix-ზე ამ წლის იანვარში გამოვიდა და უკვე მოახერხა მილიონობით მაყურებლის გულის მოგება. სერიალი გვაცნობს სოციალიზაციის პრობლემების მქონე და სექსუალურ ურთიერთობებში გამოუცდელ 16 წლის ყმაწვილს, ოტისს, რომლის დედაც, ჯინი, სექსისა და ურთიერთობების თერაპევტია.
სერიალმა, მასში გაშუქებული აქტუალური პრობლემებით, მალევე დაიმსახურა მაყურებლისა და კრიტიკოსების დადებითი შეფასებები, მასზე ალაპარაკდნენ სხვადასხვა სოციალურ ქსელებში, რამაც აუდიტორიის ინტერესი კიდევ გაზარდა.
ჩვენს რეკომენდაციაში შევეხებით 8 ძირითად მიზეზს, რომლებმაც, ჩვენი აზრით, განაპირობა სექსუალური განათლების ასეთი პოპულარობა. რატომ მოსწონს ის ასე მაყურებელს და რატომ შეიძლება მოგვეწონოს ჩვენ?
1. ესთეტიკური მხარე
პირველი ღირსება, რაც ამ სერიალის ნახვისთანავე თვალში მოგხვდებათ, ეს მისი ვიზუალური მხარეა. ესთეტიკურად ის მთლიანად 80-იანი წლების გამოძახილს მოგაგონებთ (მიუხედავად იმისა, რომ მალევე მიხვდებით: სიუჟეტი სულაც არ ვითარდება 80-იანებში), რადგან ჩვენი თანამედროვე თითქოს არც მოდაა და არც ტექნოლოგიები. ეს ყველაფერი იმას ნიშნავს, რომ, სხვა თანამედროვე შოუებისგან განსხვავებით, რომელთა მთავარი გმირებიც ახალგაზრდები არიან, აქცენტი არაა აწმყოზე – ეპოქის კონკრეტულ მონაკვეთზე, რომელიც გარკვეული დროის გასვლის შემდეგ მოძველებულად მოგვეჩვენება. პერსონაჟების სახელებიც კი – ოტისი, ერიკი, მეივი, რუბი – არ მიგვანიშნებენ რომელიმე კონკრეტულ პერიოდზე.
მოქმედების დიდი ნაწილი მთავარი გმირის, ოტისის სახლში ან სკოლაში ვითარდება და მიუხედავად იმისა, რომ სერიალი დიდ ბრიტანეთშია გადაღებული, ცალსახად ამერიკული გარემოა თავისი პასტელურ ტონებში გადაწყვეტილი კარადებით, საუზმის კლუბისეული დერეფნებით და მოსწავლეებით უნიფორმის გარეშე. და მართალია, დრო და ადგილი დაკონკრეტებული არაა, მაყურებელს ამბავში ჩართულობის განცდა მაინც მძაფრად აქვს.
“ეს ძალიან მკვეთრი სტილისტური არჩევანია” – განაცხადა მსახიობმა ალასტერ პეტრიმ, – “მათ შექმნეს მთლიანი სამყარო, რომელში საცხოვრებლადაც ნებისმიერს იწვევენ”.
2. შთამბეჭდავი ახალგაზრდული სამსახიობო გუნდი
კიდევ ერთი ფაქტორი, რის გამოც სექსუალური განათლება ჩვენს ყურადღებას იპყრობს, ნაკლებად ცნობილი, ნიჭიერი ახალგაზრდა მსახიობებისგან შემდგარი გუნდია. შეიძლება ბევრმა იცის ასა ბატერფილდი, რომელიც მანამდე რამდენიმე ცნობილ პროექტში (ჰუგო, ბიჭი ზოლიან პიჟამაში) გვინახავს, მაგრამ იმ მსახიობების უმეტესობისთვის, რომლებიც ახალგაზრდა პერსონაჟებს განასახიერებენ, ეს ეკრანზე პირველი გამოჩენაა.
3. პერსონაჟების მრავალფეროვნება
სექსუალური განათლების მზარდი პოპულარობის კიდევ ერთი საიდუმლო მისი მრავალფეროვნებაა. შოუში მრავლად არიან სხვადასხვა ეთნიკური წარმოშობის მსახიობები, რომელთა მიერ განსახიერებულ პერსონაჟებს სექსუალურ და სოციალურ თემებთან, სტერეოტიპებთან, LGBT პრობლემებთან, მათ შორის საკუთარი გენდერის აღმოჩენასთან დაკავშირებული სხვადასხვა ისტორია აქვთ.
4. ჯილიან ანდერსონის პერსონაჟი
ჯილიან ანდერსონს სერიალების სამყაროში წარდგენა არ სჭირდება, მაგრამ სექსუალურ განათლებაში მისი როლი დიდ აღფრთოვანებას იწვევს. ის რთული ბუნების ვაჟის დედაა, რომელსაც თავადაც საკმაოდ არასტაბილური პირადი ურთიერთობები აქვს და რომელიც, როგორც პროფესიონალი, ორმაგ პასუხისმგებლობას გრძნობს შვილის სექსუალური განათლების მიმართ. ჯინ მილბერნის როლი ჯილიან ანდერსონის ერთ-ერთი საუკეთესო პერფორმანსია.
5. საუნდტრეკი
80-იანი წლების ძლიერი ესთეტიკის მიუხედავად სექსუალურ განათლებაში ზოგიერთ მომენტში თანამედროვე ეპოქის ესა თუ ის ნაწარმი (სნეპჩეტი, პორნჰაბი, თანამედროვე ვალუტა და ა.შ.) გაიელვებს, რითაც ვხვდებით, რომ მოქმედება ჩვენს დროში ხდება. საუნდტრეკი კი ხშირად მართლაც სამიოდე დეკადით უკან გვაბრუნებს (A-ha-ს ‘Take On Me’, The Smiths’-ის ‘Asleep’ და Billy Idol’-ის ‘Dancing With Myself’), თუმცა ისიც თანამედროვე მუსიკასთანაა კომბინირებული.
6. საუბრები სექსზე
როგორც ამას სათაურიდანაც ვხვდებით, შოუში უხვად გველის საუბრები სექსთან დაკავშირებულ თემებსა და პრობლემებზე. ეს თინეიჯერულ ასაკში ერთ-ერთი უმნიშვნელოვანესი საკითხია. საუბრები ხშირად იუმორითაა გაჯერებული, მაგრამ მის მიღმა მართლაც სერიოზული პრობლემები იმალება, რომელთა წინაშეც თითქმის ყველა ახალგაზრდა დამდგარა.
7. თინეიჯერული გარემო
შოუ თინეიჯერული ფილმების საუკეთესო ტრადიციებშია გადაწყვეტილი – იუმორი, მაღალკლასელების სამეგობრო წრეები, საუბრები ბუფეტში, შეფარული ხუმრობები – თუმცა სერიალის იუმორი არ გადადის კომიკურობაში. მასში თითქოს ყველაფერი ნაცნობია, მაგრამ საკითხები, რომლებზეც შოუ გვესაუბრება, ახლებურად არის მოწოდებული.
8. გულთბილი მომენტები
ნებისმიერ ადამიანს, სულ ერთია რამდენად განათლებულია სექსის საკითხებში, სითბო და სიყვარული სჭირდება. რთული სოციალური და ოჯახური ურთიერთობების ფონზე ადამიანს, განსაკუთრებით თინეიჯერს, რომელიც რიგიანად საკუთარ თავსაც არ იცნობს, სტრესისგან თავის დასაცავად თუნდაც მცირე ყურადღება და მეგობრული გამხნევება სჭირდება, რასაც შოუში განსაკუთრებული ადგილი ეთმობა. სწორედ ასეთი ემპათიური მომენტების გამო ახერხებს შოუ ნებისმიერი მაყურებლის ნდობის მოპოვებას.
