მიუხედავად იმისა, რომ მისტერ რობოტი პოპულარობით სამეფო კარის თამაშებს ან მოსიარულე მკვდრებს ვერ შეედრება, მისი მაყურებელი მაინც დაგვეთანხმება, რომ ის ამ შოუებს არაფრით ჩამოუვარდება.
სერიალი ანტისოციალური ჰაკერის შესახებ 2015 წელს დაიწყო და ამჟამად მისი თაყვანისმცემლები მეოთხე სეზონის მოლოდინში არიან. თუ თქვენ ჯერ კიდევ არ შეერთებიხართ მათ რიგებს, წარმოგიდგენთ 7 მიზეზს მისტერ რობოტის ახლავე სანახავად:
1. ის მძიმე დანაშაულს მოგაგონებთ
მართალია ამ ორი შოუს სიუჟეტი ერთმანეთისგან ძალიან განსხვავდება, თუმცა მისტერ რობოტი, ისევე როგორც მძიმე დანაშაული, სავსეა სუნთქვისშემკრავი მომენტებით, არაჩვეულებრივი მუსიკალური გაფორმებითა და მოულოდნელობებით.
2. რეალისტურად წარმოგვიდგენს პროგრამისტების სამყაროს
შოუში ძალიან ზუსტადაა გადმოცემული ჰაკერული კულტურა, თუმცა სხვა წინამორბედებისაგან განსხვავებით, მაყურებელს თავს იდიოტად არ აგრძნობინებს იმის გამო, რომ ესა თუ ის ტერმინი არ იცის.
3. აღწერს ადამიანის განცდებს, რომელიც საზოგადოებას ვერ ერგება
რა თქმა უნდა, ინდივიდუალიზმი დასაფასებელია, თუმცა, როგორც წესი, პოპულარულ კულტურაში ხშირად ხდება ანტისოციალურობის რომანტიზება. მისტერ რობოტი კი პირიქით – თვალსაჩინოდ წარმოგვიდგენს ელიოტის (რემი მალეკი) ტანჯვას და გვიჩვენებს იმ ბედნიერ მომენტებსაც, როდესაც ის თავს ჩვეულებრივ ადამიანად გრძნობს.
4. არაპროგნოზირებადობა
როგორც უკვე აღვნიშნეთ, შოუ სავსეა მოულოდნელობებით. ტელევიზიის გამოცდილი თანამშრომელიც კი, რომელმაც, შესაძლოა, გარკვეულწილად ივარაუდოს, რა მოხდება შემდეგში, შოკირებული და გაოცებული რჩება მოვლენების განვითარებით, რომ არაფერი ვთქვათ რიგით მაყურებელზე.
5. მოიცავს არაერთ სოციალურ თემას
თითქმის ყველა შოუ ცდილობს კომენტარი გააკეთოს სხვადასხვა სოციალურ ასპექტზე, თუმცა მისტერ რობოტი ამ მხრივ უდაოდ ჩემპიონია – კორპორატიული და პოლიტიკური კორუფცია, საზოგადოებაში გამეფებული მატერიალიზმი და კიდევ მრავალი სხვა თემა მისტერ რობოტში ძალიან დახვეწილი გზით არის წარმოჩენილი.
6. რემი მალეკი
დიახ, ეს ადამიანი ნამდვილად იმსახურებს ცალკე პუნქტს ამ ჩამონათვალში. ის შესანიშნავად ართმევს თავს დაკისრებულ მოვალეობას და ქმნის ყველასგან განსხვავებულ, მრავალფეროვან პერსონაჟს, რომელიც თავიდან ბოლომდე ჰყავს შესისხლხორცებული.
7. ფსიქიკური აშლილობის უარყოფითი მხარეები
პოპკულტურის კიდევ ერთ ტრენდს ფსიქიკური აშლილობის რომანტიზება წარმოადგენს. ძალიან მარტივად შეგვიძლია გავიხსენოთ ათობით პერსონაჟი, რომელიც ამ დაავადებით იტანჯება, თუმცა ნაწარმოებსა თუ ფილმში ეს ყოველივე მის დადებით მხარედ არის წარმოჩენილი. მისტერ რობოტი სტერეოტიპებს ამ მხრივაც ანგრევს და ძალიან რეალისტურად წარმოგვიდგენს ადამიანს, რომელიც უბრალოდ სხვის შეხებასაც ვერ იტანს და საკუთარი ოთახის კუთხეში მოკუნტული ჩაძინებამდე ტირის.
