ალბათ, ეს ფილმები (უმეტესობა მაინც) უკვე ნანახი გაქვთ. ზოგიერთი სევდიანია, ზოგი – სასაცილო, თუმცა, ყველა მათგანი უხდება ისეთ საღამოებს, როცა უბრალოდ, გინდათ, სავარძელში ჩაეშვათ და კინოს უყუროთ. გთავაზობთ 10 ფილმს ასეთი საღამოებისთვის:
ლამაზმანი (1990)
ალბათ, ყველას გვახსოვს გერი მარშალის რომანტიკული კომედია ჯულია რობერტსისა და რიჩარდ გირის მონაწილეობით… მდიდარი ბიზნესმენი შეთანხმებას დებს ჰოლივუდელ მეძავთან, რომ მისი ესკორტი იყოს შეხვედრებსა და ღონისძიებებზე. ეს უჩვეულო შეთანხმება კი თანდათან დიდ სიყვარულში გადაიზრდება.
გაქცევა შოუშენკიდან (1994)
ბანკირ ენდი დიუფრენს ბრალს სდებენ ცოლისა და მისი საყვარლის მკვლელობაში და სამუდამო პატიმრობას უსჯიან. შოუშენკის ციხეში ის მორგან ფრიმენის გმირს უმეგობრდება. სიუჟეტის მოულოდნელი განვითარება გვარწმუნებს, რომ დიუფრენის ისტორია სინამდვილეში საოცარი ნებისყოფისა და რწმენის ისტორიაა.
ჯუმანჯი (1995)
პატარა და-ძმა მაგიური თამაშის დროს შემთხვევით უშვებს შუახნის კაცს, რომელიც მასში 25 წელზე მეტ ხანს იყო გამომწყვდეული. მათ ერთად ბევრი თავგადასავალი გადახდებათ, მაგრამ ახალი მეგობრის გასათავისუფლებლად მხოლოდ ერთი გზა არსებობს: თამაშის დამთავრება.
მწვანე გზა (1999)
სტივენ კინგის რომანის ეკრანიზაცია, სავსე მოულოდნელი ტვისტებით. სიკვდილმისჯილთა ციხის დაცვის წევრთა ცხოვრება იცვლება მას შემდეგ, რაც ახალი პატიმარი მოდის. ეს არის საზარელ დანაშაულში ბრალდებული შავკანიანი გოლიათი, რომელიც მისტიკური ნიჭითაა დაჯილდოებული.
მებრძოლთა კლუბი (1999)
მგონი, აღარ არსებობს ადამიანი, რომელსაც ეს ფილმი ნანახი არ ჰქონდეს. თუმცა, ჩაკ პალანიკის გიჟური რომანის ფინჩერისეული გიჟური ეკრანიზაცია ასჯერაც რომ ნახოთ, ასჯერვე ემოციებს აღგიძრავთ. რატომ? იმიტომ, რომ ეს სიგიჟე თანამედროვე ადამიანის სინამდვილეა.
გარიყული (2000)
თვითმფრინავის ავარიის შემდეგ მიტოვებულ კუნძულზე მოხვედრილ ჩაკ ნოლანდს გადასარჩენად ერთადერთი გზა აქვს: განიცადოს სრული ფიზიკური და ფსიქოლოგიური ტრანსფორმაცია. რობერტ ზემეკისის ფილმში მთავარ როლს ტომ ჰენკსი ასრულებს.
მის კონგენიალურობა (2000)
FBI-ს აგენტი ქალი, რომლის როლსაც სანდრა ბულოკი თამაშობს, დამნაშავის დასაჭერად იძულებულია, სილამაზის კონკურსში მიიღოს მონაწილეობა. ეს დავალება კი მის პირად ცხოვრებასა და აღქმებზეც ახდენს გავლენას.
პიანისტი (2002)
მეორე მსოფლიო ომი. ებრაელ-პოლონელი პიანისტი თვითგადარჩენისთვის იბრძვის და ვარშავის გეტოში იმალება. რომან პოლანსკის ფილმი ვლადისლავ შპილმანის რეალურ ისტორიას ასახავს. ედრიენ ბროუდის შესრულება კი ფილმს სრულიად დაუვიწყარს ხდის.
აბა დამიჭირე (2002)
დოკუმენტების გამყალბებელი, ახალგაზრდა თაღლითი გასაოცრად მოხერხებული მატყუარაა, რომლის დაჭერაც FBI-ს აგენტის, კარლ ჰენრატის მთავარ ამოცანად იქცევა. გამოცდილ აგენტს ჯერ კიდევ არ აქვს წარმოდგენა, რა სირთულის დავალებასთან აქვს საქმე…
მისტერ და მისის სმიტები (2005)
ფილმი, რომლითაც ბრედ პიტისა და ანჯელინა ჯოლის სიყვარულის ისტორია დაიწყო… ჯონ და ჯეინ სმიტების მოსაწყენ ქორწინებაში გარდატეხა ხდება: მოულოდნელად ისინი აღმოაჩენენ, რომ ორივე მათგანი გასაიდუმლოებული სამსახურის თანამშრომელი და დაქირავებული მკვლელია. დიდი ომიც ცოლ-ქმარს შორის სწორედ აქედან იწყება…
წყარო: www.brightside.com
