ალბათ, ყველას თუ არა, უმეტესობას მაინც გვქონია ჩვენს საყვარელ ადამიანებთან მტკივნეული განშორებები, რომელთა გადატანაც, არც თუ ისე მარტივია. ჩვენ შეგვიძლია გირჩიოთ, რამდენიმე ფილმი, რომელიც ამ სევდიანი პერიოდის გადაგორებაში მოგეხმარებათ და ცხოვრებას სხვა კუთხით დაგანახებთ. ვიცით, რომ ყველა გაბშორება უნიკალურ ემოციას ტოვებს, ამიტომაც შევეცდებით სხვადასხვა სიტუაციისთვის შესაფერისი ფილმები შემოგთავაზოთ…
ცვლილებების გზა
თუ გადაწყვეტილი გაქვთ, რომ მთელ გრძნობებს ცრემლებში ჩაატევთ და ისე განთავისუფლდებით უარყოფითი ემოციებისგან, მაშინ ეს ფილმი ნამდვილად თქვენთვისაა. ფილმში ქეიტ უინსლეტისა და ლეონარდო დიკაპრიოს გმირების ურთიერთობის თანამონაწილენი გახდებით, მთელ მათ ბედნიერებასა და ტრაგედიას შეიგრძნობთ და ამ მძიმე გზას მათთან ერთად გაივლით. ზოგჯერ აუცილებელია, მთელი სიმძაფრით შევიგრძნოთ, ის რაც ჩვენს თავს ხდება და ეს ფილმი ამაში ნამდვილად დაგეხმარებათ.
მოკალი ბილი
სევდა არ არის ერთადერთი გრძნობა, რომელიც განშორებას თან ახლავს. თუ შურისძიების სურვილი არ გასვენებთ, მაშინ სწორედ ეს ფილმი უნდა ნახოთ. იმ დროს, როდესაც თქვენში ბრაზი ბობოქრობს, ნუ დალეწავთ საყვარელ ჭურჭელს ან რაიმე მნიშვნელოვანს, ჯობს უმა თურმანის პერსონაჟთან ერთად გაატაროთ დრო და დაგვიჯერეთ, კმაყოფილი დარჩებით. “მოკალი ბილში” ყურადღება მთავარი გმირის სულიერ სიძლიერეზეა გამახვილებული და არა მის სასიყვარულო ინტერესებზე და ეს სწორედ ისაა, რაც თქვენ ახლა გჭირდებათ.
სუპერ მაიკი
ხდება ისეც, რომ ზოგჯერ აღვნიშნავთ ჩვენი ურთიერთობის დასასრულსა და სანატრელ მარტოობას. თუ თქვენს შემთხვევაშიც ასეა, მაშინ ნამდვილად უნდა ნახოთ ეს ფილმი. მისი ნახვის შემდეგ ნამდვილად გადაწყვეტთ ვარჯიშის დაწყებას, ბევრი ალკოჰოლის დალევას, მეგობრებთან ერთად ბარებში გასეირნებას და ვინ იცის, შესაძლოა სტრიპტიზის ცეკვასაც. ყველაფერი ზემოთ ჩამოთვლილი თქვენთვის ახლა სასარგებლოა, ამიტომაც ენდეთ სუპერ მაიკს და იმედგაცრუებული არ დარჩებით.
ფართოდ დახუჭული თვალები
არის ის შემთხვევაც, როდესაც საყვარელთან განშორება სექსუალურ დაუკმაყოფილებლობას უტოლდება. გვესმის, დაშორების შემდეგ უცხოსთან ინტიმური ურთიერთობა საკმაოდ რთულია და ზოგიერთი ჩვენგანისთვის საკმაოდ საზიზღარიც. ამიტომ, თუ თავს ამ მხრივ ცუდად იგრძნობთ, ნახეთ ეროტიული დრამა ნიკოლ კიდმანისა და ტომ კრუზის მონაწილეობით, მთელი თავისი მისტერიებით, სექსუალური ფანტაზიებითა და ორგიებით, რომელიც მარტო ყოფნის ჟამს საკმაოდ დაგეხმარებათ.
სანამ შენ გეძინა
ეს ფილმი კი მათთვისაა, ვინც ცდილობს სიყვარულის რწმენა დაიბრუნოს. ამ 2004 წლის ფილმში სანდრა ბულოკის პერსონაჟს ეზიზღება სამსახური, სადაც მუშაობს, თავისი მეზობელი და ის უხერხული მდგომარეობა, რომელშიც ის ჩავარდება, მაგრამ საბოლოოდ, ის იპოვის თავის ერთადერთ სიყვარულს, რომელთანაც მთელი ცხოვრების გატარებას გადაწყვეტს. ფილმის მთავარი გზავნილიც ისაა, რომ რაც არ უნდა ცუდ სიტუაციაში აღმოჩნდეთ, საბოლოოდ ყველაფერი კარგად დასრულდება.
სამერის 500 დღე
შეიძლება, გეგონათ, რომ ის ვისაც ახლახანს დაშორდით თქვენი ერთადერთი სიყვარულია, მაგრამ შეცდით და ახლა გულნატკენი სახლში ზიხართ და არავის ნახვა გსურთ. სამერის 500 დღე არ არის ჩვეულებრივი სასიყვარულო მელოდრამა, ეს არის ფილმი სიყვარულზე. ფილმი იმაზეა, რომ არსებობენ ადამიანები, რომლებიც ჩნდებიან ჩვენს ცხოვრებაში, შემდეგ მიდიან, მაგრამ ჩვენს რეალობას უკეთესობისკენ ცვლიან.
ნათელი გონების მარადიული ბრწყინვალება
არსებობს, მომენტები, როდესაც ურთიერთობის შემდეგ, თავს ყოვლად დაუცველად, მარტოდ და გულgატეხილად ვგრძნობთ. ადამიანის დაკარგვის შემდეგ დარჩენილი ტკივილი კი ჭკუიდან გვშლის, და ასეთ მომენტებში ვის არ სურს წარსულის დავიწყება? ნაცნობი შეგრძნებაა? მაშინ ეს ფილმი აუცილებლად უნდა ნახოთ, რომ დარწმუნდეთ: წარსული იმისთვისაა რომ გვახსოვდეს, რადგან სწორედ მან ჩამოგვაყალიბა იმ პიროვნებებად, რომლებიც ახლა ვართ. ტკივილი გაივლის, ხოლო სიყვარული კი ტკბილ მოგონებად დარჩება.
იმედის სხივთა კრებული
თუ სასოწარკვეთა და დეპრესია ის ორი სიტყვაა, რომელიც თქვენს ამჟამინდელ ყოფას საუკეთესოდ აღწერს – ეს ფილმი თქვენთვისაა. გარშემო ადამიანებს თქვენი შეიძლება კარგად არ ესმოდეთ, მაგრამ ამ ფილმის პერსონაჟებს ესმით. ორივემ საყვარელი ადამიანი დაკარგა და ნათელი მომავლის იმედი გადაეწურათ, მაგრამ ისინი ერთმანეთს შეხვდებიან და ღრუბლებს მიღმა მზის სხივებსაც დაინახავენ.
დაპირება არ ნიშნავს დაქორწინებას
ურთიერთობები რთული რამეა, და თქვენ მარტო არ ხართ. ეს ფილმი ბევრ სასიყვარულო ისტორიას მოგიყვებათ, და მიხვდებით, რომ ცხოვრება არც ისეთი უფერულია, როგორიც ის ახლა გეჩვენებათ. შეცდომები ყველას მოსდის, მაგრამ ეს არ ნიშნავს იმას, რომ სირთულეებს უნდა დანებდეთ
ამელი
თქვენ ყველასგან განსხვავებული პიროვნება ხართ და ეს პიროვნება უნდა გიყვარდეთ. საკუთარ თავთან მარტო დარჩენაში ცუდი არაფერია. ბედნიერების პოვნაში სწორედ ეს აზრი და ფილმი “ამელი” დაგეხმარებათ, რომელშიც უსაყვარლესი მთავარი გმირის როლს ოდრი ტატუ ასრულებს და აუცილებლად უამრავ რამეზე დაგაფიქრებთ.
იმედია, ჩვენ მიერ შერჩეული ფილმები ხალისს დაგიბრუნებთ და რთული პერიოდის დაძლევაში დაგეხმარებათ.
