ცხოვრებაში ყველას აქვს დღეები, როდესაც გვსურს მოვწყდეთ ყველაფერს, დავივიწყოთ ყველა საზრუნავი, გემრიელად მოვკალათდეთ და ვუყუროთ კარგ ფილმს. როდესაც ასეთი დღეები გექნებათ და უბრალოდ სასიამოვნო საღამოს გატარება მოგინდებათ, არ დაგავიწყდეთ ეს კოლექცია:

ახალი დასაწყისი (2014)

იმედისმომცემი მუსიკოსის და შოუ-ბიზნესის მივიწყებული ვარსკვლავის ისტორია, რომელშიც მთავარ როლებს კირა ნაითლი და მარკ რუფალო ასრულებენ. ფილმში ასევე ჩნდება ჯგუფ Maroon 5-ის სოლისტი, ადამ ლევინი. წინ ლირიკული და სასიამოვნო ფილმი გელით სასიამოვნო საუნდტრეკებითა და კარგი მსახიობებით, კიდევ რა არის საჭირო განწყობის ასამაღლებლად?

ცხოვრება, როგორც სასწაული (2004)

ცნობილი რეჟისორის ემირ კუსტურიცას ერთ-ერთი საუკეთესო ფილმი, რომელიც, ერთი შეხედვით, ძალიან მარტივი შინაარსის მატარებელია, თუმცა, სინამდვილეში, ის გაცილებით ღრმაა. ეს ფილმი სიყვარულზეა, თუმცა შეიძლება ითქვას, რომ ფილმი საერთოდ არ ტვირთავს მაყურებელს. ოსტატურად შესრულებული ნამუშევარი, რომელიც მარტივად ყურებადია და ნამდვილად დიდ შთაბეჭდილებას ტოვებს მაყურებელზე.

რით დავიმსახურეთ ეს? (2014)

ფრანგული კომედია დიდ ოჯახზე. სტერეოტიპები, რომლებიც საზოგადოებაში ბევრ კამათს იწვევს, ოსტატურად არის მოწოდებული და მაყურებელს დაფიქრების საშუალებას აძლევს. შესანიშნავი კომედია, რომელიც კარგ სამსახიობო შემადგენლობას, იუმორს, სიუჟეტსა და მარადიულად აქტუალურ ოჯახურ პრობლემებს აერთიანებს.

ცხოვრება, ისეთი, როგორც სინამდვილეში (2010)

ოჯახური კომედია, რომელიც ღრმა აზრით არ გამოირჩევა და გარკვეულ კლიშეებსაც შეიცავს, თუმცა ეს არ უშლის მას ხელს სასიამოვნო საყურებელი იყოს – მარტივი და მომენტებში გულისამაჩუყებელი ისტორია. ფილმის კიდევ ერთი დადებითი მხარე, რომლის გამოც ფილმის ყურება ღირს, მსახიობები არიან, მთავარ როლებს ქეთრინ ჰეილი და ჯოშ დუჰამელი ასრულებენ.

ტენენბაუმების ოჯახი (2001)

როგორც ყოველთვის აღვნიშნავთ ხოლმე, უეს ანდერსონის ფილმები – ეს წარმოუდგენლად, განსაკუთრებულად თბილი და მყუდრო სამყაროა. ეს ფილმი უჩვეულო ოჯახის ისტორიას მოგვითხრობს, რომლის თითოეული წევრი უნიკალურ თავისებურებით გამოირჩევა. ფილმი სავსეა ბევრი დახვეწილი დეტალით, ატმოსფერო და ფერთა გამა კი აუცილებლად დაგამახსოვრებთ თავს.

სახელი (2012)

არაჩვეულებრივი კომედია ფრანგული აქცენტითა და დიალოგებით, ხუმრობებით, გულწრფელობითა და ცხარე კამათებით. ისტორია სამეგობრო წრეზე მოგვითხრობს, რომელიც ერთმანეთისთვის სიახლეების გასაზიარებლად შეიკრიბა, თუმცა ნელ-ნელა სიტუაცია იცვლება და იძაბება. მარტივი, საინტერესო და კარგი იუმორით გაჯერებული ისტორია, ნამდვილად დაგეხმარებათ სასიამოვნო საღამოს გატარებაში.

მე ვარ სიყვარული (2009)

ლუკა გუადანინო ამ ფილმის იდეას 11 წელი ინახავდა, ტილდა სუინტონი კი სპეციალურად ამ როლისთვის იტალიურ და რუსულ ენებს სწავლობდა. განსაკუთრებულ ყურადღებას იქცევს ვიზუალური მხარეც: ინტერიერი, პეიზაჟები, კოსტიუმები – ფილმი ნამდვილად ულამაზესი გამოვიდა და ოსკარზეც დაიმსახურა ნომინაცია საუკეთესო კოსტიუმების დიზაინისთვის.

რაღაც ახალი (2006)

ისტორია გოგონაზე, რომელსაც ყველაფერი კარგად აქვს: წარმატებული კარიერა, დიდი სახლი, მაგრამ ვერაფრით ახერხებს პირადი ცხოვრების დალაგებას. დადებითი რომანტიკული კომედია, რომელიც მეტ-ნაკლებად მაინც ეხება მნიშვნელოვან საკითხებს. არაჩვეულებრივი ფილმი იმისთვის, რომ რთული სამუშაო დღის შემდეგ განიტვირთოთ და დაისვენოთ.

საკმარისია სიტყვები (2013)

ფილმი საშუალო ასაკის განქორწინებულ ქალზე მოგვითხრობს, რომლის ქალიშვილიც მალე კოლეჯში გაემგზავრება. სასიამოვნო ფილმი, რომლის სიუჟეტიც საკამოდ რეალურია და ნებისმიერ ადამიანს შეიძლება გადახდეს. სასიამოვნო რომანტიკული კომედია შესანიშნავი სამსახიობო “ქიმიით” და ცხოვრებისეული სიუჟეტით.

სიკვდილი დაკრძალვაზე (2007)

ფრანკ ოზის ფილმი მოგვითხრობს ოჯახზე, რომელშიც ოჯახის თავი გარდაიცვალა და ყველა გლოვობს. თუმცა რეჟისორი ამ ყველაფერს გადმოგვცემს არა სევდიანი ხერხით, არამედ შავი იუმორით გაჯერებული, რომელიც, ალბათ, ყველა მაყურებელზე არც არის გათვლილი, რადგან შავი იუმორის მთავარი თვისებაც ეს არის, ზოგი მასში ხუმრობებს ხედავს, ზოგი კი – შეურაცხყოფას.