ინგლისელი მსახიობი – კირა ნაითლი ჰოლივუდის ერთ-ერთი ყველაზე დაფასებული და მოთხოვნადი სახეა. ქარიზმატული გარეგნობისა და სამსახიობო ნიჭის წყალობით, მსახიობს მშობლიური ბრიტანეთიდან ამერიკის დიდ კინოინდუსტრიაში ფეხის მოკიდება დიდად არ გასჭირვებია. ახალგაზრდა მსახიობით კინოსტუდიები მალევე დაინტერესდნენ. კარიერის განმავლობაში მსახიობმა არაერთი საინტერესო როლი განასახიერა და დღესაც აქტიურად განაგრძობს თავის სამსახიობო მოღვაწეობას.
სინემანია წარმოგიდგენთ კირა ნაითლის 5 საუკეთესო როლს:
5. კარიბის ზღვის მეკობრეები
კირა ნაითლის ფილმოგრაფიაზე საუბრისას წარმოუდგენელია, არ გაგვახსენდეს კარიბის ზღვის მეკობრეები და მისი გმირების დაუვიწყარი თავგადასავალი. მეკობრეების პირველი ნაწილი ეკრანებზე 2003 წელს გამოვიდა. თავდაპირველად, ყველა ჯონი დეპის ექსცენტრიულ გმირზე – კაპიტან ჯეკ ბეღურაზე საუბრობდა, თუმცა ფილმის თაყვანისმცემლებს ყურადღების მიღმა არც ორლანდო ბლუმისა და კირა ნაითლის პერსონაჟები დარჩენიათ. ობიექტურობისთვის უნდა აღინიშნოს, რომ კირა ნაითლის გმირის – ელიზაბეტ სვონის პოპულარობა 2006 წელს, მეკობრეების მეორე ნაწილის გამოსვლის შემდეგ გაცილებით გაიზარდა. სვონი ბრიტანელი თინეიჯერების ნამდვილი კერპი გახდა, თუმცა გარდა ფილმის ფანებისა, კრიტიკოსებიც აღნიშნავდნენ, რომ მსახიობმა წინ დიდი ნაბიჯი გადადგა და ნაითლის გმირი მეკობრეების მეორე და მესამე ნაწილში ბევრად სოლიდურად გამოიყურება.
4. მონანიება
ჯო რაიტის სასიყვარულო დრამა – მონანიება ეკრანებზე 2007 წელს გამოვიდა და მაშინვე ყველა კირა ნაითლის პერსონაჟის ულამაზეს მწვანე კაბაზე ალაპარაკდა. კაბა მართლაც თვალისმომჭრელი იყო, თუმცა არანაკლებ შთამბეჭდავი იყო ნაითლის შესრულება. სხვათა შორის, თავდაპირველად ფილმის რეჟისორი ნაითლის ამ როლზე არც განიხილავდა, თუმცა სცენარის წაკითხვის შემდეგ მსახიობს სესილია ტალისის გმირი იმდენად მოეწონა, რომ საბოლოოდ, რეჟისორიც დაარწმუნა, რომ ყველაზე მეტად სწორედ ეს პერსონაჟი შეეფერებოდა. საბოლოოდ, ნაითლის ინტუიციამ გაამართლა, ის მართლაც შესანიშნავად თამაშობს ძლიერი, ვნებიანი, მღელვარე, ნერვული და ამავე დროს, ძალიან შეყვარებული ქალის როლს.
3. ახალი დასაწყისი
თუ თქვენ ერთდროულად მუსიკაც ძალიან გიყვართ და კინოც, მაშინ ჯონ კარნის ფილმები აუცილებლად უნდა ნახოთ. ამ რეჟისორის მიერ 2013 წელს გადაღებული მუსიკალური დრამა – ახალი დასაწყისი, მარკ რუფალოსა და კირა ნაითლის მონაწილეობით, ორი ადამიანის ემოციურ ისტორიას გვიყვება. ახალბედა მომღერლისა და წარსულში წარმატებული, ამჟამად კი – ხელმოცარული პროდიუსერის შეხვედრა რაღაც ახლის დასაწყისი ხდება. მაყურებელი ფილმის განმავლობაში თვალს ადევნებს მთავარი გმირების მეგობრობისა და სიყვარულის სევდიან ისტორიას, რომელიც შესანიშნავი მუსიკითაა გაფორმებული. კირა ნაითლის სიმღერის ნიჭი და მშვენიერი ვოკალური მონაცემები სიურპრიზი არავისთვის ყოფილა, თუმცა რაც შეეხება გიტარას, ამ ინსტრუმენტზე დაკვრა მსახიობმა სპეციალურად ამ როლისთვის ისწავლა. ფილმს ნამდვილად ბევრი ღირსება აქვს და ერთ-ერთი სწორედ მსახიობების ბრწყინვალე შესრულებაა. დიალოგების გარკვეული ნაწილი იმპროვიზებულია, რაც სურათს უფრო საინტერესოს ხდის. ფილმის გამოსვლის შემდეგ კირა ნაითლი აღნიშნავდა, რომ ეს იყო ერთ-ერთი საუკეთესო პროექტი, რომელშიც მონაწილეობა მიუღია.
2. სიამაყე და ცრურწმენა
2005 წელს ჯო რაიტმა ჯეინ ოსტინის ყველაზე ცნობილი რომანის – სიამაყე და ცრურწმენა ეკრანიზაცია გადაიღო. სხვათა შორის, რეჟისორს მთავარი გმირის – ელიზაბეტ ბენეტის როლზე კირა ნაითლის აყვანა სულაც არ სურდა, რადგან თვლიდა, რომ ის ამ როლისთვის ზედმეტად მიმზიდველი იყო. თუმცა, მას შემდეგ, რაც მსახიობს პირადად შეხვდა, ჯო რაიტმა აზრი რადიკალურად შეიცვალა და მსახიობი როლზე დაამტკიცა. როგორც აღმოჩნდა, რეჟისორს ინტუიციამ არ უღალატა – მსახიობმა ოსტინის გმირი ბრწყინვალედ ითამაშა და როლისთვის ოსკარის პირველი ნომინაციაც დაიმსახურა.
1.იმიტაციის თამაში
2014 წლის ერთ-ერთი ყველაზე გახმაურებული და წარმატებული ფილმი იმიტაციის თამაში გვიყვება გენიოსი მათემატიკოსის, ალან ტიურინგის შესახებ, რომელიც მეორე მსოფლიო ომის მიმდინარეობისას გერმანული კოდის – ენიგმას გატეხვას ცდილობდა. მათიმატიკოსის როლს ბენედიქტ კამბერბეტჩი, ხოლო მისი ცოლის, ჯოან კლარკის როლს კი – კირა ნაითლი ასრულებს. მსახიობები შესანიშნავი პარტნიორები აღმოჩნდნენ. ისინი რეალურ ცხოვრებაშიც მეგობრობენ და გადასაღებ მოედანზეც ხელი არაფერს შეუშლია. 2015 წლის ოსკარებზე ფილმმა 8 ნომინაცია დაიმსახურა, რომელთაგან ერთ-ერთი სწორედ კირა ნაითლის შესანიშნავ სამსახიობო მონაცემებს უსვამდა ხაზს (შეგახსენებთ, რომ ეს მსახიობისთვის ოსკარის რიგით მეორე ნომინაცია იყო). მიუხედავად იმისა, რომ მეორეხარისხოვანი როლის შემსრულებელი საუკეთესო მსახიობი ქალის ნომინაციაში კირა ნაითლიმ ვერც ამჯერად გაიმარჯვა, მისი გულშემატკივრებიც და კრიტიკოსებიც ერთხმად აღიარებდნენ, რომ ჯოან კლარკის როლი მსახიობის კარიერაში ერთ-ერთი საუკეთესო იყო.
