დისნეი 1937 წელს შეიქმნა და მას შემდეგ უამრავი ანიმაცია აჩუქა ბავშვებს. ზოგი მათგანი ძალიან წარმატებული გამოდგა, ზოგიც – ნაკლებად, თუმცა დისნეის ხელწერა ყველა მულტფილმში იგრძნობა.
ამ კოლექციაში შემოგთავაზებთ დისნეის 10 მულტფილს, რომლებმაც ის აღიარება ვერ მოიპოვეს, რომელსაც იმსახურებდნენ.
10. The Rescuers Down Under
The Rescuers Down Under დისნეის 29-ე ნამუშევარია. 1989 წელს გამოვიდა პატარა ქალთევზა, ხოლო 1991 წელს – მზეთუნახავი და ურჩხული. მაშველებზე შექმნილი ანიმაცია, რომელსაც მთავარ გმირში პრინცესა არ ჰყოლია, უსამართლოდ ჩაიკარგა ამ ორ მასშტაბურ პროექტს შორის. არადა, სანახავად ნამდვილად ღირს – ფრენის ეპიზოდები საოცრად არის დახატული, პერსონაჟების სიღრმე და დიალოგები კი ყველაზე პრეტენზიულ მაყურებლებსაც კი მოეწონებათ.
9. The Princess And The Frog
პრინცესა და ბაყაყი დისნეის თამამი განაცხადია. ეს არის პირველი მულტფილმი, რომელშიც მთავარი გმირი აფროამერიკელი გოგონაა. გარდა ამისა, ტიანას მიზანი გათხოვება კი არა, საკუთარი რესტორნის გახსნაა. სიმღერა, რომელსაც მთავარი გმირი ასრულებს, საოცრად მელოდიური და გადამდებია.
8. Pocahontas
მართალია, პოკაჰონტასის სიმღერა ყოველთვის ხვდება ხოლმე დისნეის საუკეთესო საუნდტრეკების სიაში, მაგრამ თვითონ მულტფილმს ცოტა თუ იცნობს. ამის მიზეზი ალბათ ისაა, რომ პოკაჰონტასი საჩოთირო თემას ეხება – ინდიელებისა და ბრიტანელების ურთიერთობას.
7. Meet The Robinsons
ეს არის ანიმაცია, რომელიც გულს გაგითბობთ – ობოლი ბიჭი, რომელიც მეცნიერებით არის გატაცებული, გადაწყვეტს, რომ შექმნას დროის მანქანა, რათა საკუთარი დედა იპოვოს. სწორედ ამ მულტფილმით დამტკიცდა, რომ დისნეის კარგად ესმის დროში მოგზაურობის კონცეფტი და გარდა ამისა, სიუჟეტის მოულოდნელი განვითარებით მაყურებლების გაოცებაც შეუძლია.
6. Atlantis: The Lost Empire
2001 წელს გამოშვებული ატლანტიდა ინდიანა ჯონსის ანიმაციურ ვერსიას ჰგავს და ისეთი ლამაზია, რომ თვალს ვერ მოაშორებთ.
5. Treasure Planet
საწყენია, რომ დისნეის სათავგადასავლო მიმართულება ხალხმა არ აიტაცა. განძის პლანეტა ისეთ გრძნობებს გაგიღვიძებთ, როგორსაც ბავშვობაში ჟიულ ვერნის კითხვა იწვევდა.
4. Home on the Range
დისნეის ექსპერიმენტების არ ეშინია და მზადაა, ყველა ჟანრში მოსინჯოს ძალები. Home on the Range სასაცილო ვესტერნია, რომელშიც სამი ძროხა საკუთარი ფერმისთვის ფულის შეგროვებას ცდილობს.
3. Robin Hood
რობინ ჰუდი დისნეიმ 1973 წელს შექმნა და ადამიანების ნაცვლად ცხოველები გამოიყენა. განსხვავებით თავდაპირველი სიუჟეტისგან, სასიყვარულო ხაზს აქ გაცილებით დიდი მნიშვნელობა ენიჭება.
2. Hercules
ეს ანიმაცია ყველაფერს მოიცავს: მითოლოგიას, საბრძოლო სცენებს, რომანტიკას, სასაცილო დიალოგებს და გასაოცარ მუსიკალურ გაფორმებას. გარდა ამისა, მეგი, ჰერკულესის რჩეული, ერთ-ერთი ყველაზე საინტერესო ქალი პესონაჟია დისნეის სამყაროში.
1. The Emperor’s New Groove
ერთადერთი მიზეზი, რის გამოც ამ ანიმაციამ დიდი აღიარება ვერ მოიპოვა, ისაა, რომ ვიზუალურად დისნეის ნამუშევარს არ ჰგავს. თუ ნანახი არ გაქვთ, აუცილებლად ნახეთ. ამდენს დისნეის სხვა მულტფილმებზე სავარაუდოდ ვერ იცინებთ.
