ქვემოთ ჩამოთვლილი ფილმები სხვადასხვა ჟანრს მიეკუთვნება. მათ კინოში გარდატეხა შეიტანეს და დამსახურებულად ითვლებიან საეტაპო ფილმებად. ესაა 1960-იანი წლების 10 ყველაზე გავლენიანი ფილმი:
2001 წელი: კოსმიური ოდისეა (1968)
კოსმოსური ხომალდის ბორტზე განვითარებული ამბავი ადამიანის ევოლუციასა და მომავალზე, ისტორიის სხვადასხვა პერიოდის გადარჩენაზეა. სტენლი კუბრიკის ეს სურათი სამეცნიერო ფანტასტიკის ჟანრში საუკეთესოდაა მიჩნეული.
ლოურენს არაბი (1962)
დევიდ ლინის ბიოგრაფიული ფილმი აღწერს თომას ედვარდ ლოურენსის ისტორიას, ინგლისელი ჯაშუშის, რომელიც არაბებს ჩაუდგა სათავეში თურქების წინააღმდეგ ბრძოლაში და პირველი მსოფლიო ომის გმირად იქცა.
ბინა (1960)
ფილმის მთავარ გმირს თავისი უფროსი სასიყვარულო თავგადასავლებისთვის ბინის გასაღებს სთხოვს და კაცი დიდ გაუგებრობაში აღმოჩნდება. ის, რაც მის ბინაში ხდება, სრულიად ახალი რეალობაა, რომელსაც მანამდე არ იცნობდა.
რა დაემართა ჯეინს? (1962)
ოდესღაც ყველასთვის საყვარელი მსახიობი – ჯეინი ვერაფრით ეგუება, რომ მისი ასევე მსახიობი და მასზე წარმატებულია. ქალს ეს ფაქტი ჭკუიდან შლის… საინტერესოა, რომ მთავარი როლის შემსრულებელი ორი ლეგენდარული მსახიობი – ბეტი დევისი და ჯოან კროუფორდი რეალურ ცხოვრებაშიც მტრობდნენ ერთმანეთს.
უდარდელი ბაიკერი (1969)
მახსენდება უდარდელი ბაიკერის პირველი ჩვენება კანის კინოფესტივალზე. როდესაც დარბაზში ვიჯექი, უკვე ვიცოდი, რომ ეს ჩემი, როგორც კინოვარსკვლავის დაბადების მომენტი იყო… – განაცხადა ერთ-ერთ ინტერვიუში ჯეკ ნიკოლსონმა. ჰიპი ბაიკერების თავგადასავალი დაუვიწყარი საუნდტრეკებითაა გაფორმებული.
პერსონა (1966)
ინგმარ ბერგმანის ფილმი გვიყვება მსახიობ ქალზე, რომელიც ნერვული კრიზისის შემდეგ განმარტოებულად, ახალგაზრდა მედდასთან ერთად ცხოვრობს. სამყაროსგან მოწყვეტილი ორივე ქალი საკუთარი პიროვნების გაცნობიერების პროცესშია.
ბონი და კლაიდი (1967)
ნამდვილ ამბავზე დაფუძნებული ფილმი მოგვითხრობს წყვილზე, რომელიც ქალაქიდან ქალაქში გადადის და ბანკებს ძარცვავს. ფილმის თხრობა და ბრწყინვალე იუმორით გაჯერებული სცენები დაუვიწყარია მაყურებლისთვის.
ნუ მოკლავ ჯაფარას (1962)
ჰარპერ ლის გახმაურებული რომანის ბრწყინვალე ეკრანიზაცია, მთავარ როლში – გრეგორი პეკით. ეს არის ფილმი სიკეთეზე, ადამიანობაზე, ღირებულებებზე და კიდევ იმაზე, რომ ჯაფარას მოკვლა არ შეიძლება…
ვის ეშინია ვირჯინია ვულფის? (1966)
ფილმი აღწერს ერთ ღამეს შუახნის წყვილის ცხოვრებიდან, რომელთაც ურთიერთობაში კრიზისი აქვთ. ემოციურად გაუწონასწორებელი მარტას როლმა ელიზაბეტ ტეილორს მეორე ოსკარი მოუტანა.
ფსიქო (1960)
ერთხელ მე ირონიული ფილმი გადავიღე. ვგრძნობდი, რომ შინაარსი საკმაოდ სახალისო იყო და შევძრწუნდი, როდესაც აღმოვაჩინე, რომ ხალხმა ის სერიოზულად მიიღო… – ეს ალფრედ ჰიჩკოკის სიტყვებია, რომელიც მან მე-20 საუკუნის ერთ-ერთ ყველაზე აღიარებულ სურათზე – ფსიქოზე თქვა.
