შობა-ახალი წელი სწორედ ის პერიოდია, როდესაც ყველაზე მეტად ველით სასწაულებს. თუმცა ეს სასწაულები უფრო ხშირად არა ზებუნებრივ ძალებთან, არამედ ჩვენს პირად ცხოვრებასთან ასოცირდება.
წარმოგიდგენთ 15 საუკეთესო ფილმს, რომელთა ყურებაც ამ საახალწლო განწყობას ნამდვილად აგიმაღლებთ და შეგახსენებთ, რომ საშობაოდ არაჩვეულებრივი ისტორიები ხდება.
შვებულება
რომანტიკული ისტორია მოგვითხრობს ორ იმედგაცრუებულ ქალზე, რომლებიც მსოფლიოს სხვადასხვა წერტილებიდან ერთმანეთს სახლებს გაუცვლიან. ზამთრის შვებულებების დროს ორივე მათგანი საყვარელ მამაკაცს პოულობს. ფილმში შევხვდებით ისეთ მსახიობებს, როგორებიცაა კამერონ დიასი, ქეით უინსლეტი, ჯუდ ლოუ და ჯეკ ბლექი.
რეალური სიყვარული
რვა სრულიად განსხვავებული წყვილის ისტორია, რომელთაც შობა აერთიანებს, წინასაახალწლო პერიოდში ერთ-ერთი აუცილებლად სანახავი ფილმია. მით უმეტეს, რომ ქასთი ჰიუ გრანტით, კირა ნაითლით, ლიამ ნისონითა და კოლინ ფერტითაა დაკომპლექტებული.
თეთრი შობა
მეორე მსოფლიო ომის დასრულების შემდეგ ნიჭიერი ჯარისკაცები, ბობი და ფილი გადაწყვეტენ მოცეკვავე მომღერლები გახდნენ. ისინი გაიცნობენ მომხიბვლელ დებს, ბეტისა და ჯუდის და მათთან ერთად შესანიშნავ კვარტეტს ქმნიან.
ელფი
ისტორია კაცზე, რომელიც ელფებთან ერთად გაიზარდა, თუმცა სიმაღლის გამო მათ შორის ყოველთვის გამოირჩეოდა და საკუთარი წარმომავლობის დასადგენად ამერიკის შეერთებულ შტატებში გაემგზავრა.
12 პაემანი შობას
ეს ფილმი ნამდვილად მოგვაგონებს ზაზუნას დღის საშობაო ვერსიას მას შემდეგ, რაც ქეითი წარუმატებელ პაემანზე ზუსტად 12-ჯერ აღმოჩნდება.
საშობაო კოცნა
პრისილა ინტერიერის დიზაინერია და გულმოდგინედ ასრულებს საკუთარ სამუშაოს. თუმცა ერთ მშვენიერ დღეს მოულოდნელად აკოცებს ახალგაზრდა მამაკაცს, რომელიც ძალიან შეუყვარდება. თუმცა ყველაფერი არც ისე მარტივადაა, რადგან ეს მომხიბვლელი მამაკაცი მისი უფროსის საქმრო აღმოჩნდება.
სანამ შენ გეძინა
კიდევ ერთი კლასიკა, რომლის გარეშეც შობა ნამდვილად ვერ ჩაივლის – სანდრა ბალოკისა და ბილ ფულმანის რომანტიკული ისტორია, რომელიც მანამ ვითარდება, სანამ ლიუსის წარმოსახვითი საქმრო კომაშია და ღრმად ძინავს.
ეპისკოპოსის მეუღლე
ისტორია ეპისკოპოსზე, რომლის ცხოვრებაშიც საშობაოდ ნამდვილი ანგელოზი გამოჩნდება და ეხმარება მას, როგორც საოცნებო ტაძრის აშენებაში, ასევე ცოლთან ურთიერთობის აღდგენაში.
სტოუნების ოჯახი
საშობაოდ სტოუნების ოჯახი ტრადიციულად ერთად იკრიბება. მათ შორის არის მათი ვაჟის საცოლე, მერედიტიც (სარა ჯესიკა პარკერი). ფილმში საკმაო საინტერესოდაა აღწერილი არასტანდარტული ოჯახური ურთიერთობები, რომლებიც შობის ფონზე ვითარდება.
მეოჯახე
შესანიშნავი ფილმი ნიკოლას ქეიჯის მონაწილეობით მოგვითხრობს მამაკაცის ისტორიას, რომელიც საკუთარი ცხოვრების ალტერნატიულ ვერსიაზე ფიქრობს – რა იქნებოდა მას რომ კოლეჯის შეყვარებულზე ექორწინა, მასთან შვილები ჰყოლოდა და ნამდვილი მეოჯახე ყოფილიყო?
ოთხი შობა
წყვილს საშობაოდ მშობლებთან სტუმრობა უწევს, თუმცა ოთხივე მათგანი განქორწინებულია და ცალ-ცალკე ცხოვრობს. რიზ უიზერსპუნის პერსონაჟი და მისი მეორე ნახევარი შობას ოთხ სხვადასხვანაირ სიტუაციაში ატარებენ.
ეს მშვენიერი ცხოვრება
კიდევ ერთი შესანიშნავი ისტორია დედამიწაზე მოვლენილი ანგელოზის შესახებ, რომელიც ამჯერად სასოწარკვეთილ ბიზნესმენს ეხმარება და ცდილობს დაანახოს, თუ როგორი იქნებოდა ცხოვრება, მას რომ არ ეარსება.
საშობაო ზღაპარი
შობა ის დღესასწაულია, რომელიც ბზარშეპარულ ოჯახებსაც კი აერთიანებს. სწორედ ასე ხდება ვუილარდების შემთხვევაშიც, რომელთა ოჯახის უფროსსაც (კატრინ დენევი) ჯანმრთელობასთან დაკავშირებული პრობლემები აქვს.
ინტუიცია
ჯონ კიუსაკისა და კეიტ ბეკინსეილის რომანტიკული ისტორია მოგვითხრობს წყვილზე, რომელიც მხოლოდ ერთხელ შეხვდა, თუმცა ეს საკმარისი აღმოჩნდა ერთმანეთის შესაყვარებლად. მომდევნო წლების განმავლობაში კი ისინი კვლავ განაგრძობენ ერთმანეთის ძებნას.
თქვენთვის წერილია
კიდევ ერთი შესანიშნავი ისტორია წყვილზე, რომელთაც ერთმანეთი ინტერნეტის საშუალებით შეუყვარდებათ. მეგ რაიანისა და ტომ ჰენკსის კლასიკად ქცეული ფილმი წინასაახალწლოდ ნამდვილად საუკეთესო არჩევანია.
