ქვემოთ ჩამოთვლილი ფილმები, გარდა იმისა, რომ ბევრს გაცინებთ, აუცილებლად გიბიძგებთ თვითრეფლექსიისა და იმის ანალიზისკენ, რაზეც შესაძლოა, აქამდე არც კი გიფიქრიათ. ესაა 10 უჩვეულო კომედია, რომელიც უნდა ნახოთ:
წაკითხვისთანავე დაწვით (2008)
ძმები კოენების შავი კომედია მოგვითხრობს ცენტრალური სადაზვერვო სააგენტოს ყოფილ მაღალჩინოსანზე, რომელიც მემუარებს წერს. ეს მემუარები კი სპორტდარბაზის ორ თანამშრომელს უვარდება ხელში და ისინი დათხოვნილი მაღალჩინოსნის დაშანტაჟებას გადაწყვეტენ.
კომედიის მეფე (1982)
რუპერტ პაპკინს სჯერა, რომ ბრწყინვალე კომედიანტია და საქვეყნო დიდებისკენ ისწრაფვის. სინამდვილეში ის უნიჭოა, მაგრამ ძლიერი სურვილი რეალობის დანახვაში ხელს უშლის. ფილმი სავსეა სასაცილო მომენტებით, რობერტ დე ნიროს შესრულება კი მას სრულიად დაუვიწყარს ხდის.
ტენენბაუმების ოჯახი (2001)
უეს ანდერსონის შესანიშნავი კინოსურათი მოგვითხრობს ტენენბაუმების უცნაურ ოჯახზე – ნიჭიერი და ტრაგიკული ბავშვებით, რომლებსაც ხანგრძლივი განშორების შემდეგ კვლავ გაერთიანება და წარსულის გაანალიზება უხდებათ.
მიცვალებულები პლედებს არ ატარებენ (1982)
ახალგაზრდა ქალი დარწმუნებულია, რომ მამამისის სიკვდილი უბედური შემთხვევა არ ყოფილა და ამაში დასარწმუნებლად კერძო დეტექტივს ქირაობს. დეტექტივი გამოძიების პროცესში დიდ ინტრიგაში ეხვევა…
მონსტრი (1994)
რობერტო ბენინის ფილმი, სადაც მთავარ როლს თავად თამაშობს, გვიყვება ცოტათი სულელ და მოუხერხებელ კაცზე, რომელიც პოლიციას სერიული მკვლელი ჰგონია. ის კი თავისი უჩვეულო ქმედებებით მათ ამაში სულ უფრო არწმუნებს.
და ყველაფერი განათდა (2005)
ჯონათან საფრან ფოერის რომანის ბრწყინვალე ეკრანიზაცია მოგვითხრობს ახალგაზრდა ამერიკელ ებრაელზე, რომელიც პოლონეთში მიემგზავრება იმ ქალის საპოვნელად, ვინც მეორე მსოფლიო ომის დროს ბაბუამისი სიკვდილს გადაარჩინა. ფილმი სავსეა ულამაზესი კადრებითა და უჩვეულო კომედიური სცენებით.
ფილადელფიური ისტორია (1940)
მაღალი წრის წარმომადგენელთა ქორწილი მედიის ყურადღებას იქცევს. ცერემონიას ორი ჟურნალისტი სტუმრობს და კიდევ პატარძლის ყოფილი ქმარი, რომელსაც დიდი არეულობა შემოაქვს.
ნებრასკა (2013)
მოხუცი კაცი შვილთან ერთად ნებრასკაში მიემგზავრება ლატარიის შესაძლო მილიონიანი პრიზის მისაღებად. მელანქოლიური ატმოსფეროს მიუხედავად, ფილმში ბევრი სასაცილო მომენტია და რაც მთავარია – მომენტები, რომლებიც ცხოვრების ძირეულ საკითხებზე გვაფიქრებს.
ოჯახის ჭერი (1970)
ფილმი რეალისტურად აღწერს იმ სიტუაციებსა და დეტალებს, რომელსაც ქორწინება მოიცავს. სიუჟეტის ცენტრში კი ახალგაზრდა წყვილია, რომელიც უკვე მზადაა ქორწინების შესაწყვეტად.
ჯენტლმენური თამაშები (2004)
სამხრეთელი პროფესორი კაზინოს ძარცვის გეგმას შეიმუშავებს და მიზნის მისაღწევად ახლოს მდებარე სახლში ოთახს ქირაობს. სახლის მეპატრონე მოხუცი შავკანიანი ქალბატონია, რომლის სიტყვებითაც, ამქვეყნად ადამიანების ორი ტიპი არსებობს: ვისაც ბუასილი აქვს და ვისაც მალე ექნება…
