ოსკარის დაჯილდოების ცერემონია ყოველ წელს კამათის უამრავ თემას ბადებს. ჟიურის გადაწყვეტილებით ბევრი უკმაყოფილო რჩება და ინტერნეტ სივრცეც ერთგვარ ომის ველად იქცევა ხოლმე. 2019 წლის ოსკარის დაჯილდოების სამზადისი ნელ-ნელა ზენიტს აღწევს და ჩვენც გადავწყვიტეთ შეგახსენოთ ის ფილმები, რომლებმაც ოსკარი ნამდვილად დაიმსახურა.
უცხოპლანეტელი
ეს არის სტივენ სპილბერგის საკულტო ფილმი, რომელიც ბავშვებისა და უცხოპლანეტელის მეგობრობის ამბავს გვიყვება. მთავარი გმირის, ანუ უცხოპლანეტელის პერსონაჟის შექმნა, იმ დროისთვის საკმაოდ რთული იყო და აღფრთოვანება დაიმსახურა. ბიუჯეთურად ფილმმა ვარსკვლავურ ომებსაც კი გაასწრო ხოლო გულისამაჩუყებელმა ისტორიამ გულგრილი არავინ დატოვა.
ბენ-ჰური
ეს ფილმი ნამდვილად ყველამ უნდა იცოდეს. ის იმ ფილმის სამეულშია, რომლებსაც ოსკარების რეკორდული რაოდენობა აქვთ მიღებული. ფილმის მოვლენები ჩვენი წელთაღრიცხვით 26 წელს, პალესტინაში ვითარდება. ორი ძველი მეგობრის, იუდეველისა და რომაელის განწირული მეგობრობის ამბავი დამსახურებულად ითვლება კინემატოგრაფიის ერთ-ერთ შედევრად.
ბეჭდების მბრძანებელი: ხელმწიფის დაბრუნება
LOTR-ის ტრილოგიის მესამე ნაწილმა, 11 ოსკარი მოიპოვა და სრულიად დამსახურებულად. გენიალური ტოლკინის წიგნის მიხედვით გადაღებული ფილმი, სიკეთისა და ბოროტების მარადიული ბრძოლის შესახებ, მსახიობების ოსტატური შესრულება, სპეცეფექტები, მოკლედ ფილმს ყველაფერი აქვს იმისთვის რომ ამაყად განაცხადოს: “ყველა ეს ოსკარი, აბსოლუტურად დამსახურებულია!”
ნათლია
ეს საკულტო საგა, რომელშიც მთავარ როლებს მარლონ ბრანდო და ალ პაჩინო ასრულებენ, ერთ-ერთი იმ ფილმთაგანია, რომელიც სამუდამოდ გვემახსოვრება. მაფიოზთა კლანი, რომლის ამბავიც თითქმის ყველა ჩვენგანისთვის ცნობილია. ამ ფილმის პოსტერიც კი საკულტოა !
ტიტანიკი
ჯეიმს კამერონის ეს ფილმი, კიდევ ერთი რეკორდსმენია ოსკარების რაოდენობაში. მთავარი პერსონაჟების სიყვარულის ისტორია, კაპიტანი, რომელიც საკუთარ ხომალდთან ერთად ფსკერზე დაეშვება, კლასობრივი უთანასწორობა, მუსიკოსები, ფილმის ყველა დეტალი გვახსოვს და გვიყვარს.
მოხუცების ადგილი აქ არ არის
ძმები კოენების დაუვიწყარი ფილმი, რომელიც თავს მსახიობთა ფანტასტიური შესრულებით, საინტერესო კადრებით, დიალოგებით და მთლიანი სიუჟეტით გვამახსოვრდება. 4 სრულიად დამსახურებული ოსკარი ამ ფილმმა 2009 წელს მიიღო და ისტორიაშიც, კინოკლასიკად შემორჩა.
ქარიშხლის მბრძანებელი
ამ ფილმმა 2010 წელს ოსკრების რაოდენობით ჯეიმს კამერონის ავატარს სრულიად დამსახურებულად, გადაუსწრო. ძალიან საინტერესო სიუჟეტი, რომელიც ერაყში ამერიკელი ჯარისკაცებისა და ერთი უცნაური ომზე შეყვარებული მთავარი გმირის ისტორია ნამდვილად იმსახურებდა ყველა ჯილდოს რომელიც მიიღო.
შინდლერის სია
სპილბერგის ეს საკულტო ფილმი, რომელიც ფაშისტების უსაზღვრო ბოროტებაზე, ადამიანის ბუნებაზე, სიკეთეზე, ბრძოლაზე, სულიერ სიძლიერეზე, უსამართლობის ტრაგიზმზე და კიდევ უამრავ მნიშვნელოვან თემაზე გვესაუბრება. შავ-თეთრ ფილმში წითელ პალტოში ჩაცმული ბავშვის გამოჩენა კი კინემატოგრაფიის ერთ-ერთი ყველაზე დასამახსოვრებელი კადრია.
ვიღაცამ გუგულის ბუდეს გადაუფრინა
სრულიად ჯანმრთელი ადამიანის ისტორია, რომელიც ციხეში სასჯელის მოხდის თავიდან ასარიდებლად ფსიქიატრიული კლინიკის კედლებს შეაფარებს თავს. იქ კი უკვე სპეციფიური კონტიგენტის გამოცოცხლებას, გამოღვიძებას ცდილობს. ჯეკ ნიკოლსონის ეს საკუკლტო როლიც ყველას გვახსოვს და, რა თქმა უნდა, ყველა ოსკარი, ფილმმა აბსოლუტურად დამსახურებულად მიიღო.
ირმებზე მონადირე
ეს არის დაუვიწყარი და ტრაგიკული ფილმი, რომელშიც აშშ-ს ვიეტნამის ავანტიურისადმი ამერიკელი ინტელიგენციის სინანული ყველაზე ნათლად იკვეთება. ისტორიამ, ორი მეგობრის შესახებ,რომელთა ბედიც შეიცვალა სრულიად აბსურდული ომის გამო, ნამდვილად ყველა ჩვენგანის და ამერიკული კინოაკადემიის გული დაიპყრო.
რა თქმა უნდა, ამ სიაში კიდევ ბევრი ფილმი შეიძლებოდა მომხვდარიყო, თუმცა ჩვენ, ამჯერად ეს ათი შევარჩიეთ თქვენ კი შეგიძლიათ ნებისმიერი მათგანით ისიამოვნოთ.
