ქვემოთ ჩამოთვლილი ფილმები სხვადასხვა ჟანრს მიეკუთვნება და მაყურებელშიც განსხვავებულ ემოციებს იწვევს. თუმცა, ათივე მათგანს ერთი საერთო აქვს – სიუჟეტი ზაფხულში ვითარდება.
იმოქმედე სწორად (1989)
ზაფხული. ბრუკლინი. ჩვენ ვუყურებთ ღარიბი სამეზობლოს ყოველდღიურ ცხოვრებას, მათ ურთიერთობას ერთმანეთთან და სამყაროსთან. როდესაც ტემპერატურა მაღლა იწევს და აუტანელი სიცხე დგება, მოვლენები უკონტროლო ხდება.
უტიფარი (2011)
ახალ სახლში გადასვლის შემდეგ 10 წლის გოგონა გადაწყვეტს, მეზობლებს უთხრას, რომ სინამდვილეში ბიჭია. ბავშვობის ნიუანსების გაცოცხლების გარდა, ფილმი ასახავს იდენტობის ჩამოყალიბების პროცესს, რომელიც ეჭვებითა და გაურკვევლობითაა სავსე.
ყბები (1975)
უზარმაზარი თეთრი ზვიგენი სანაპიროს ატერორებს და დამსვენებლებს თავს ესხმის. რამდენიმე ადამიანი, ადგილობრივი შერიფის ხელმძღვანელობით, მის მოკვლას გადაწყვეტს…
მე ვიცი რა ჩაიდინეთ წინა ზაფხულში (1997)
ოთხი თინეიჯერი მეგობარი ტრაგიკული ინცინდენტისას ადამიანს იმსხვერპლავს. ისინი გვამს იშორებენ და ფიცს დებენ, რომ ამის შესახებ არავისთან არაფერი წამოსცდებათ. თუმცა, დრო გადის და ერთსა და იმავე შინაარსის წერილებს იღებენ: მე ვიცი რა ჩაიდინეთ წინა ზაფხულში.
გათავისუფლება (1972)
მეგობრები ზაფხულის დღეების სასიამოვნოდ გატარებასა და ტბაზე ნავით გასეირნებას დაგეგმავენ. მოულოდნელად, ისინი ადგილობრივების სამიზნედ იქცევიან და ექსტრემალურ სიტუაციებში აღმოჩნდებიან.
პარიზი, ტეხასი (1984)
ოთხწლიანი გაუჩინარების შემდეგ, ტრევისი ზაფხულის ერთ მშვენიერ დღეს სახლში ბრუნდება. მას ძალიან უჭირს კონტაქტი ოჯახის წევრებთან და სოციუმთან. საკუთარ თავში ჩაკეტილი, ფაქტობრივად, თავიდან სწავლობს ცხოვრებას.
ნამზეური (2016)
შუახნის ასაკის ექიმი საბერძნეთის პატარა კუნძულზე იწყებს მუშაობას. მისთვის ზამთრის ერთფეროვანი დღეები მოსაწყენია. თუმცა, დგება ზაფხული და ექიმი ხვდება 20 წლის გოგონას, რომლითაც შეპყრობილი ხდება და მის გამო სრულიად იცვლის ცხოვრების სტილს.
დარჩი ჩემთან (1986)
ზაფხულის ერთ დღეს პატარა მეგობრები ტყეში წასვლას გადაწყვეტენ დაღუპული ბიჭის ცხედრის მოსაძებნად. მათ რთული და მოულოდნელი დაბრკოლებების გადალახვა მოუწევთ, რაც მათ მეგობრობას გამოცდას მოუწყობს.
სიყვარული წესების გარეშე (2003)
სანაპირო. ზაფხულის ღამეები. ფილმის მთავარი გმირი შუახნის მამაკაცია, რომელსაც ახალგაზრდა გოგონები იზიდავს. მისი ცხოვრება რთულდება, როდესაც უკანასკნელი საყვარლის დედას ხვდება და სასიყვარულო სამკუთხედი იკვრება.
შენი სახელი დამიძახე (2017)
17 წლის მოზარდი ზაფხულს მშობლებთან ერთად ატარებს. ის კითხულობს, უკრავს, მეგობრებთან ერთად ერთობა. მერე კი ამერიკიდან მამამისის სიმპათიური კოლეგა ჩამოდის და ბიჭს თავს პირველი სიყვარული ატყდება.
