ქვემოთ ჩამოთვლილი ფილმები ძირითადად დრამის ჟანრს მიეკუთვნება და ყოფიერების საკითხებს იკვლევს. მათი გმირები ზოგჯერ ისეთ ქმედებებს სჩადიან, რაც ადამიანისგან ძნელი წარმოსადგენია, თუმცა ფილმები ამ ქმედებათა ფსიქოლოგიურ მიზეზებზეც მიგვანიშნებს. ეს არის 10 შთამბეჭდავი, მაგრამ ემოციურად დამანგრეველი ფილმი, რომლის მეორედ ნახვაც ნამდვილად გაგიჭირდებათ:
სიყვარული (2012)
ცოლის მოულოდნელი ავადმყოფობა კაცს აიძულებს, ახალ რეალობას შეეგუოს, რაც 80 წელს მიტანებული მოხუცისთვის ძალიან რთულია. მიხაელ ჰანეკე ტრადიციულად – დაუნდობელი და რეალისტია და ცხოვრების მტკივნეულ მხარეებზე შეულამაზებლად გვიყვება.
კალიბრი (2018)
ორი შუახნის მეგობარი შაბათ-კვირის სასიამოვნოდ გატარებასა და მთაში სანადიროდ წასვლას გადაწყვეტს. თუმცა, მოულოდნელი შემთხვევა მათ გეგმებს რევს და ისინი ექსტრემალურ სიტუაციაში აღმოჩნდებიან…
შეუქცევადი (2003)
ცოლის გაუპატიურების შემდეგ კაცი მეგობართან ერთად ცდილობს, მოძალადე იპოვოს და შური იძიოს. ტრაგიკული ისტორიის გარდა, გასპარ ნოეს გადაღების მანერა, ფერები, ქაოსური კადრები მაყურებელზე მძიმედ მოქმედებს და მასში საშინელ დაძაბულობას იწვევს.
ციცინათელების სასაფლაო (1988)
კინოსურათიდან მიღებული შთაბეჭდილება იმდენად ძლიერია, რომ ჩვენ ანიმაციური ფილმების მნიშვნელობის გადაფასებას ვიწყებთ, – ასე შეაფასა კინოკრიტიკოსმა როჯერ ებერტმა ციცინათელების სასაფლაო – ყველა დროის ერთ-ერთი საუკეთესო სურათი, რაც კი ომის თემაზე შექმნილა; ფილმი, რომელიც მეორე მსოფლიო ომის დროს იაპონიაში, ობოლი და-ძმის ტრაგიკულ ისტორიას გვიყვება.
ღონიერი (1998)
ორი პატარა ბიჭი ერთმანეთისთვის რწმენისა და ძალის მიმცემი ხდება, იმ ერთადერთი რამის, რასაც მათი გადარჩენა შეუძლია. მიუხედავად იმისა, რომ მეგობრობის საოცარ ისტორიას აცოცხლებს, ფილმი მაყურებელზე ძალიან მოქმედებს.
ჩურჩული და ყვირილი (1972)
ოჯახის წევრის სასიკვდილო სენი ემოციურად დანარჩენებისთვისაც ისეთივე დამანგრეველი აღმოჩნდება, როგორც დაავადებულისთვის. მაშ, როგორ უნდა გაუმკლავდნენ ისინი ამ ყველაფერს? იქნებ ერთადერთი გამოსავალი ურთიერთმხარდაჭერაა?
ოთახი (2015)
პატარა ჯეკს სჯერა, რომ მთელი სამყარო იმ ერთ ოთახშია, სადაც დედასთან ერთად ცხოვრობს და საიდანაც არასდროს გასულა. მისთვის უმძიმესი აღმოჩნდება იმის გაცნობიერება, რომ გარეთ უზარმაზარი სამყარო არსებობს, რომელშიც მას შემდეგ მოუწევს ცხოვრება, რაც დედის რისკიანი გეგმა გაამართლებს. თუმცა, გარესამყაროში კვლავ დაბრუნება არც დედისთვის აღმოჩნდება მარტივი.
ოცნების რექვიემი (2000)
2000-იანების ერთ-ერთი ყველაზე პოპულარული ფილმი, რომელსაც უზარმაზარი გამოხმაურება მოჰყვა. დამოკიდებულებას – ნარკოტიკებზე, ფსიქოტროპულებზე, ნებისმიერ შემთხვევაში ტრაგიკული შედეგი აქვს, რადგან სპობს ყველაფერ ადამიანურს და აბსოლუტურად ანგრევს პიროვნებას.
დოგვილი (2003)
მინიმალისტურ სტილში გადაღებული ფილმი საზოგადოების სისასტიკეზე, დანაშაულის განცდაზე, სიკეთესა და ბოროტებაზე, შურისძიებაზე, ადამიანის რეალურ ბუნებაზე… დოგვილი ლარს ფონ ტრიერის ერთ-ერთი საუკეთესო ნამუშევარია, თუმცა მისი ყურება მეორედ ნამდვილად გაგიჭირდებათ. იმავეს თქმა შეიძლება დანიელი რეჟისორის ნებისმიერ სხვა ფილმზეც.
მე, დენიელ ბლეიკი (2016)
კენ ლოუჩის ფილმი ასახავს ერთი ადამიანის განწირულ ბრძოლას სისტემის წინააღმდეგ, აჩვენებს ბიუროკრატიულ და სისტემის სხვა მანკიერებებს, რომლებიც მყარადაა გამჯდარი სოციუმში. ეს საოცრად ტრაგიკული ისტორიაა, დამანგრეველი შედეგებითა და ემოციური ფინალით.
