1910 წელს, პატარა ქალაქ სპოკანში, ახალგაზრდა კაცთა ქრისტიანული ასოციაციის შეკრებაზე არკანზასელი სონორა სმარტ დოდი მივიდა და წამოაყენა ინიციატივა, დაეწესებინათ მამების საერთაშორისო დღე. სონორას მამამ – უილიამ სმარტიმ, მეუღლის გარდაცვალების შემდეგ, მარტომ გაზარდა ექვსი შვილი… იქიდან მოყოლებული, მსოფლიო ივნისის მესამე კვირას მამის დღეს აღნიშნავს. სინემანია გთავაზობთ 10 ფილმს, რომელსაც მამასთან ერთად უნდა უყუროთ:
პატარძლის მამა (1991)
როდესაც იგებს, რომ მისი ერთადერთი ქალიშვილი თხოვდება, მამა ლამისაა ჭკუიდან შეიშალოს. ის ვერაფრით ეგუება ფაქტს, რომ საყვარელი შვილი მასთან აღარ იცხოვრებს. ეს ბრწყინვალე კომედია ბევრს გაცინებთ და სასიამოვნო განწყობას შეგიქმნით.
მორისი ამერიკიდან (2016)
13 წლის ნიუ-იორკელი მორისი საცხოვრებლად გერმანიაში გადადის, რაც მისთვის ახალი გამოწვევაა. თუ მის კლასელებს საცეკვაო მუსიკა იზიდავთ, მორისს რეპერობა სურს. ამასთანავე, ის ცდილობს, გაუგოს მამას, რომელიც ცოტა ხნის წინ დაქვრივდა.
მისის დაუთფაიერი (1993)
მეუღლესთან დაშორების შემდეგ კაცს სასამართლო ბავშვების ნახვის ნებას მხოლოდ კვირაში ერთხელ რთავს. თუმცა, შვილებზე უზომოდ შეყვარებული მამა გამოსავალს პოულობს – გრიმისა და ტანსაცმლის მეშვეობით ის მოხუცი ძიძა, მისის დაუთფაიერი ხდება.
სადღაც (2010)
ჯონი მარკო ჰოლივუდის ვარსკვლავია, რომელიც ცხოვრებას სმასა და გართობაში ატარებს. თუმცა, 11 წლის ქალიშვილის სტუმრობა სიტუაციას ცვლის. კაცი განვლილი ცხოვრების გადაფასებას იწყებს და ყველანაირად ცდილობს, გახდეს კარგი მამა.
მამის მსგავსი (2018)
რეიჩელს საქმრო საკურთხეველთან მიატოვებს, რის მერეც ახალგაზრდა ქალი დიდი ხნის უნახავ მამასთან ერთად გამოთვრება. დილას კი იღვიძებს გემზე, სადაც ქმართან ერთად თაფლობის თვის გასატარებლად უნდა წასულიყო. ეს მოგზაურობა მამა-შვილს ერთმანეთის უკეთ გაცნობასა და ურთიერთობის დალაგებაში ეხმარება.
დიდი მამა (1999)
32 წლის მთავარ გმირს მოულოდნელად უწევს მამის როლის მორგება და ის ისე იქცევა, რომ ნებისმიერი ბავშვისთვის საოცნებო მამა იქნებოდა: 5 წლის ბიჭს ყველაფრის ნებას რთავს. ბავშვს შეუძლია, ის აკეთოს, რაც მოესურვება…
მორიგე მამიკო (2003)
სამსახურის დაკარგვის შემდეგ ედი მერფის გმირი საგონებელში ვარდება, თუ როგორ იზრუნოს საკუთარ შვილზე. სწორედ ამიტომ, გადაწყვეტს, სახლში ბავშვთა ცენტრი გახსნას და მეზობლების ბავშვებს მოუაროს. მას წარმოდგენაც არ აქვს, რამხელა სირთულეების გადალახვა მოუწევს.
ინტერსტელარი (2014)
მკვლევართა ჯგუფი სახიფათო მისიით მიემართება კოსმოსში დედამიწის გადასარჩენად. გენიოსი გოგონა კი ყველაფერს აკეთებს მამის დასახმარებლად. კრისტოფერ ნოლანის ეს სურათი უდაოდ 21-ე საუკუნის ერთ-ერთი ყველაზე დასამახსოვრებელი ფილმია.
ბითუმად იაფია (2003)
ფეხბურთის გუნდის მწვრთნელი მოწვევას იღებს და ოჯახთან ერთად საცხოვრებლად დიდ ქალაქში გადადის. ახალი სახლი, ახალი სკოლა… ბავშვები ცდილობენ, გაუმკლავდნენ ჩაგვრას, შეიძინონ მეგობრები და ა.შ. და ა.შ. მამა კი აცნობიერებს, რომ ეს ცვლილება ოჯახისთვის სულაც არ აღმოჩნდა ბედნიერების მომტანი.
ბედნიერების კვალდაკვალ (2006)
ნამდვილ ამბავზე დაფუძნებული და ალბათ, საუკეთესო ფილმი მამა-შვილის ისტორიაზე. ესაა სიღარიბესთან, უმწეობასა და სასოწარკვეთასთან ბრძოლის ამბავი, ამბავი მუდმივ მარცხზე და არდანებებაზე; ბრძოლაზე, რომელსაც შვილის სიყვარული ასაზრდოებს…
