ინსომნია ჩვენი საუკუნის გავრცელებული სენია და ყველა ინსომნიაკმა იცის, რამხელა ტანჯვაა უძილობა. ჩვენ უკვე შემოგთავაზეთ ფილმები, რომლებიც ძილს მოგგვრიდათ. ახლა კი გთავაზობთ 10 ფილმს, რომელიც უძილო ღამის გადატანაში დაგეხმარებათ:
ინსომნია (2002)
პირველს სწორედ ამ ფილმს გთავაზობთ, რომელსაც თქვენი პრობლემის სახელი ჰქვია. შესაძლოა, ბევრ თქვენგანს აღარც გახსოვდეთ კრისტოფერ ნოლანის ადრეული ნამუშევარი – მთავარ როლებში ალ პაჩინოთი და რობინ უილიამსით, თუმცა ორი გამომძიებლის ისტორია, რომელიც 17 წლის გოგონას მკვლელობის საქმის ირგვლივ ვითარდება, ნამდვილად დაგეხმარებათ უძილო ღამის გადატანაში.
მემანქანე (2004)
მემანქანე საუკეთესო თუ არა, ერთ-ერთი საუკეთესო ფილმია ინსომნიაზე, რომლისთვისაც მთავარი როლის შემსრულებელმა, კრისტიან ბეილიმ 30 კგ დაიკლო. ფილმის მთავარ გმირს თითქმის ერთი წელია არ სძინებია და რეალობის აღქმა დაკარგული აქვს. საშიში ხილვებით დაღლილი, ის საკუთარი ცნობიერების კვლევას იწყებს, რათა შეშლილობას გადაურჩეს.
ტაქსის მძღოლი (1976)
უძილობა აწუხებს ტრევის ბიკლისაც ტაქსის მძღოლიდან. ვიეტნამის ომის ვეტერანი ინსომნიასთან საბრძოლველად ტაქსის მძღოლი ხდება. თუმცა, ღამის ნიუ-იორკის ქუჩების ამორალობა, რასაც მისი ქაოსური ფიქრები და მარტოსულობა ერთვის, დე ნიროს გმირს საზარელ სისასტიკემდე მიიყვანს. როგორც კვენტინ ტარანტინომ თქვა: ესაა ერთ-ერთი ყველაზე კომპლექსური გმირი კინოს ისტორიაში.
მებრძოლი (2010)
კრისტიან ბეილის კიდევ ერთი სურათი, რომელიც უძილო ღამის გადაგორებაში დაგეხმარებათ, მებრძოლია – დევიდ ო. რასელის ფილმი ბოქსიორ მიკი უორდზე, რომელიც ასევე ბოქსიორი უფროსი ძმის სახელის ჩრდილიდან გამოსვლასა და საკუთარი გზის პოვნას ცდილობს. მისი გზა კი მსოფლიო ჩემპიონობამდე მართლაც უმძიმესი აღმოჩნდება.
ძმები (2009)
უფროსი ძმის ავღანეთში გაუჩინარების შემდეგ, ჯეიკ ჯილენჰოლის გმირი ყველანაირად ეხმარება მის ცოლ-შვილს და საშიში გრძნობებიც ჩნდება. მერე კი, მოულოდნელად უფროსი ძმა ბრუნდება, ომის საზარელ მოჩვენებებთან ერთად…
ზამთრის ძვალი (2010)
ავადმყოფი დედა და ნარკოდილერი მამა, რომელიც ციხეში ზის. რის მარტოს უწევს, უმცროს და-ძმაზე ზრუნვა და თავის გატანა. მერე მამას ციხიდან უშვებენ, მაგრამ ის ქრება. შერიფი კი მოდის და ამბობს, რომ მას სასამართლოში ფული აქვს შესატანი და თუ ამ ფულს არ გადაიხდიან, სახლს დაკარგავენ…
პირველყოფილი შიში (1996)
ედვარდ ნორტონის ერთ-ერთი ადრეული როლი – ჩიკაგოელი არქიეპისკოპოსის მკვლელობაში ბრალდებული ბიჭის, რომელიც ცხადი სამხილების მიუხედავად, ამტკიცებს, რომ დამნაშავე არაა. გამოძიების პროცესში უამრავი ბინძური საქმე ამოდის ზედაპირზე. თუმცა, მთავარი კითხვა უცვლელი რჩება: მართლა აქვს პიროვნების გაორება აარონს?
ფხიზლად ძილი (2000)
მთავარ როლებში ჯეფ დენიელსითა და ემილი ბერგლით, ფილმი მოგვითხრობს კოლეჯის პროფესორზე, რომელიც იღვიძებს და ხვდება, რომ მისი ცოლი სახლში არ დაბრუნებულა. ის ყველაფერს აკეთებს, რათა პასუხი მიიღოს მეუღლის გაუჩინარებაზე.
განსაკუთრებით საშიში დანაშაული (2002)
წარმატებული ადვოკატი ქალის ცხოვრება მოულოდნელად იცვლება მას შემდეგ, რაც აღმოაჩენს, რომ მისი ქმარი საიდუმლო აგენტია, გამოგონილი სახელით, და ახლა მძიმე სამხედრო დანაშაულში ედება ბრალი. მას წინ გასაიდუმლოებული სასამართლო პროცესი ელის…
რისხვა (2004)
და ბოლოს – კიდევ ერთი ფილმი, რომელიც უძილო ღამის გაძლებაში დაგეხმარებათ, 2004 წლის კრიმინალური თრილერი – რისხვაა, ისტორია დაზვერვის ყოფილ თანამშრომელზე, რომელიც 10 წლის გოგონას მცველობას თანხმდება. ფილმის სიუჟეტი და დენზელ ვაშინგტონისა და დაკოტა ფენინგის ბრწყინვალე შესრულება არათუ ძილის, არამედ ამოსუნთქვის საშუალებასაც არ მოგცემთ.
