მიუხედავად იმისა, რომ ყველა მათგანი კარგი ნამუშევარია, ფოლადის ნერვები უნდა გქონდეთ, ამ ფილმებს მშვიდად რომ უყუროთ. ზოგიერთ შემთხვევაში ამას ვიზუალი განაპირობებს, ზოგიერთ შემთხვევაში – სცენარი, თუმცა ერთი რამ საერთოა: ათივე ფილმი გაგაღიზიანებთ, შეგაწუხებთ და ნერვებს დაგაგლიჯავთ.
ჯოჯოხეთიდან აღმდგარი (1987)
ისინი თავიანთ ძველ, ოჯახის სახლს სტუმრობენ. ქალი შედის ერთ-ერთ ოთახში, რომელიც მისი ქმრის ძმასა და ყოფილ საყვარელს ეკუთვნოდა. ამ სასიყვარულო სამკუთხედის სისხლიანი ისტორიაც სწორედ აქედან იწყება. მიუხედავად იმისა, რომ კადრები აუცილებლად დაგძაბავთ და გაგაღიზიანებთ, ეს ერთ-ერთი საუკეთესო საშინელებათა ფილმია.
შეუძლებელი (2012)
დასასვენებლად წასულ ოჯახს ცუნამი ატყდება და მათი მოგზაურობა წარმოუდგენელ კოშმარად იქცევა. ეს ტრაგიკული ისტორია ნამდვილ მოვლენებს ეფუძნება, რომელიც ტაილანდში, 2004 წელს მოხდა.
ბედნიერება (1998)
ფილმში ვხედავთ განსხვავებულ ადამიანებს, რომელთაც ერთი საერთო აქვთ: ბედნიერების გამუდმებულ ძიებაში არიან. ამის მიუხედავად, პერსონაჟების მდგომარეობას ყველაზე ზუსტად სწორედ ფილმის სახელწოდების საპირისპირო სიტყვა შეესაბამება.
პიანისტი ქალი (2001)
შეუძლებელია, მიხაელ ჰანეკეს ამ ნამუშევარმა, იზაბელ იუპერის ბრწყინვალე შესრულებით, ნერვები არ მოგიშალოთ. ეს არის ამბავი კონსერვატორიის პროფესორ ქალზე, რომელიც მოხუც დედასთან ერთად ცხოვრობს, პირადი ცხოვრება არ აქვს და უჩვეულო და მაზოხისტური სექსუალური აქტებითა დაკავებული.
მიმიფურთხებია თქვენი საფლავებისათვის (2010)
მწერალი ქალი პატარა ქალაქში ტყისპირა სახლს ქირაობს წიგნის დასამთავრებლად, მაგრამ ადგილობრივების სამიზნე და მათი სისასტიკის მსხვერპლი ხდება. ის გადარჩენას მოახერხებს და გადაწყვეტს, ნებისმიერი გზით შური იძიოს…
მე ვნახე ეშმაკი (2010)
სიუჟეტის ცენტრში იდუმალი სერიული მკვლელია, რომელიც ქალებს აუპატიურებს და კლავს, მის დაჭერას კი ვერ ახერხებენ. ყველაფერი იცვლება მას შემდეგ, რაც მისი მორიგი მსხვერპლი საიდუმლო აგენტის საყვარელი ადამიანი გახდება…
მოკვეთა (2012)
ყოველმხრივ უცნაური ფილმი გვიყვება მოზარდ გოგონაზე, რომელსაც ექიმობა სურს და მიზნის მისაღწევად წარმოუდგენლად სისხლიან, სადისტურ ქმედებებს იწყებს. ამ ფილმის საყურებლად ნამდვილად სიმამაცე და გამძლეობა დაგჭირდებათ.
ეშვი (2009)
ოჯახი სამყაროსგან სრულიად მოწყვეტილად ცხოვრობს. სახლს მხოლოდ მამა ტოვებს ხოლმე. სამ მოზარდ და-ძმას კი სჯერა, რომ ამის უფლებას მაშინ მიიღებენ, როდესაც ეშვს მოიცვლიან… იორგოს ლანთიმოსის ამ უცნაურმა და შესანიშნავმა სურათმა დიდი ვნებათაღელვა გამოიწვია.
ეშმაკის განდევნილები (2005)
სერიული მკვლელების ოჯახი, რომელსაც პოლიციამ მიაგნო, გამუდმებით იცვლის ადგილს, წასვლისას კი მსხვერპლებს ტოვებს. რობ ზომბის ეს სურათი წარმოადგენს მისივე ფილმის – ათასი გვამის სახლი გაგრძელებას.
ღამე მშვიდობისა, დედიკო (2014)
მას შემდეგ, რაც დედა პლასტიკურ ოპერაციას გაიკეთებს და სახლში დაბინტული სახით ბრუნდება, ძმებს უჩნდებათ ეჭვი, რომ ის მათი დედა არ არის… ღამე მშვიდობისა, დედიკო საშინლად, საშინლად შემაწუხებელი ფილმია, რომლის საყურებლადაც მართლა ფოლადის ნერვები გჭირდებათ.
წყარო: www.movielistnow.com
