დღევანდელ კოლექციაში ჩვენ მოგიყვებით ფილმებზე, რომლებიც ვთვლით, რომ განსაკუთრებული განწყობით, ფერებით, ემოციებითა და ისტორიებით, აუცილებლად მოგანდომებთ სამოგზაუროდ წასვლას და იმ ადგილების მონახულების სურვილსაც გაგიჩენთ, სადაც ფილმში ესა თუ ის სცენა მიმდინარეობს.

მოკლედ, ბევრი რომ არ ვილაპარაკოთ და ვიზეარზეც ბილეთებს რომ მალევე ჩაუსაფრდეთ, გთავაზობთ 10 ფილმს, რომელიც აუცილებლად, აუცილებლად მოგანდომებთ ახალი ადგილების დაპყრობას:

ნოთინგ ჰილი – ინგლისი (1999)

როჯერ მიჩელის სამი ოქროს გლობუსის ნომინანტმა ფილმმა მაყურებლის სიმპათია წიგნების მაღაზიის მეპატრონის და ჰოლივუდის ვარსკვლავის რომანტიკული ურთიერთობის გარდა ინგლისის ულამაზესი პეიზაჟებით დაიმსახურა, განსაკუთრებით კი მათი ყურადღება პორტობელოს გზამ და წიგნების მაღაზიამ მიიპყრო. ამ ფილმის გამოსვლის შემდეგ, რომელშიც მთავარ როლებს ჯულია რობერტსი და ჰიუ გრანტი ასრულებენ, ეს ადგილები ტურისტებისთვის განსაკუთრებულად პოპულარული გახდა.

წყნარი კაცი – ირლანდია (1952)

ირლანდიური კლასიკა, რომელშიც მთავარ როლებს ჯონ ვეინი და უმშვენიერესი მორინ ო’ჰარა ასრულებენ, მაყურებელს ირლანდიური პეიზაჟებით, დიალექტით და იუმორით ანებივრებს. ფილმი მაიო-გოლუეის საზღვარზეა გადაღებული. თქვენ ასევე შეამჩნევთ ჯონ ვეინის ქანდაკებას. ფილმმა ოსკარი საუკეთესო ოპერატურისთვის მიიღო, ჯონ ფორდმა კი ამ ნამუშევრისთვის მეოთხე ოსკარი მიიღო კატეგორიაში ოსკარი საუკეთესო რეჟისორისთვის.

კასაბლანკა – მოროკო (1942)

მაიკლ ქერთიზის კლასიკად ქცეული ფილმი, რომელშიც მთავარ როლებს ჰამფრი ბოგარტი და ინგრიდ ბერგმანი ასრულებენ, სულაც არ არის გადაღებული კასაბლანკაში, მოროკოში. ფილმის გადაღებები სინამდვილეში კალიფორნიაში მიმდინარეობდა. კასაბლანკაში ბოგარტის პერსონაჟის ღამის კლუბის ასლი გაკეთდა. ასევე უნდა აღინიშნოს, რომ ფილმმა დიდი პოპულარობა მოიპოვა გამოსვლისთანავე და ოსკარის სამი კატეგორიის გამარჯვებულიც გახდა.

მზის ამოსვლამდე – ავსტრია (1995)

ყველასთვის საყვარელი მელოდრამა, რომელშიც ამერიკელი ბიჭი და კოლეჯის სტუდენტი გოგონა მატარებელში ხვდებიან ერთმანეთს და გადაწყვეტენ ერთი დღე ვენაში გაატარონ. ფილმში განსაკუთრებული ყურადღება ხიდმა და მუსიკალურმა მაღაზიამ მიიქცია, რომელშიც ეტან ჰოუკი და ჯული დელპი ქეთ ბლუმის ვინილს “Come Here” უსმენენ.

რომაული არდადეგები – იტალია (1953)

თავისი ყოველდღიური სამეფო ვალდებულებებით დაღლილი პრინცესა, რომელსაც ოდრი ჰეპბერნი ასრულებს, იპარება და გრეგორი პეკის პერსონაჟს, ამერიკელ რეპორტიორს ხვდება, რომელსაც მასთან ინტერვიუ უნდა ჩაეწერა და საბოლოო ჯამში ერთად გაატარეს მთელი დღე. უილიამ უაილერის კლასიკად ქცეულ ფილმში მაყურებლის ყურადღება ესპანურმა კიბემ და სასახლე პალაცო კოლონამ მიიპყრო. ფილმმა ოსკარის სამ კატეგორიაში გაიმარჯვა.

თუმცა, აქვე გეტყვით, ესპანურ კიბეებს რომში, ასეთ ცარიელს ვერასდროს იხილავთ. ის მუდმივად ტურისტებითაა გადაჭედილი.

შუაღამე პარიზში – საფრანგეთი (2011)

ეს ფერადი ფილმი ნოსტალგიურ და ლამაზ მოგზაურობას წარმოგვიდგენს ჯაზის ეპოქაში, სადაც ოუენ უილსონის პერსონაჟი ფიცჯერალდებს, სალვადორ დალის, გერტრუდა სტაინს და ჰემინგუეის ხვდება და საკუთარი რომანის შთაგონების წყაროსაც პოულობს. ვუდი ალენმა გადაღებების ძირითად ლოკაციად სენტ-ეტიენ-დიუ-მონის ტაძარი აარჩია, სადაც უილსონის გმირი ჯაზის ეპოქის წარმომადგენლებს ხვდება შუაღამეს. ვუდი ალენმა ოსკარი საუკეთესო ორიგინალური სცენარისთვის მიიღო.

ჭამე, ილოცე, შეიყვარე – იტალია, ინდოეთი და ინდონეზია (2010)

ეს არის ელიზაბეტ გილბერტის რეალურ ამბავზე დაფუძნებული ფილმი განქორწინებულ ქალზე, რომელიც იტალიაში, ინდოეთში და ინდონეზიაში მოგზაურობს. ერთ-ერთი გამორჩეული სცენა, როდესაც გილბერტი ველოსიპეტით სეირნობს ბალიში, ინდონეზიაშია გადაღებული. ასევე, ფილმის გამოსვლის შემდეგ ძალიან პოპულარული გახდა ადგილი რომშიც, სადაც ჯულია რობერტსი პიცას მიირთმევს.

მამა მია! – საბერძნეთი (2008)

უკვე ყველამ კარგად იცის სიუჟეტი ახალგაზრდა დანიშნულ გოგონაზე, რომელმაც დედის სამი ყოფილი მეგობარი მამაკაცი ქორწილში დაპატიჟა იმის გასარკვევად, თუ რომელია მამამისი. სიუჟეტი საბერძნეთის პატარა კუნძულზე ე.წ. კალოკაირზე ხდება, თუმცა რეალურად მისი სახელი სკოპელოსია.

ვიკი, კრისტინა, ბარსელონა – ესპანეთი (2008)

ვუდი ალენის კიდევ ერთი ფილმი, რომელიც ორი საუკეთესო მეგობრის შესახებ მოგვითხრობს. ისინი ბარსელონაში მიემგზავრებიან და ორივეს ერთი და იგივე მხატვარი უყვარდება, რომელსაც ჯერ კიდევ თავისი პრობლემური ყოფილი ცოლი უყვარს. გადაღებები ძირითადად სალამანდრას შადრევანთან და სანტა მარია დელ ნარაკოს ტაძართან მიმდინარეობდა. პენელოპე კრუსმა ამ როლისთვის ოსკარი მიიღო საუკეთესო მსახიობი ქალისთვის მეორეხარისხოვან როლში.

უოლტერ მიტის საიდუმლო ცხოვრება – ისლანდია (2013)

ფილმი, რომელიც მოკლე ისტორიას ეყრდნობა, მოგვითხრობს ადამიანზე, რომელიც თავის მომაბეზრებელ ცხოვრებას ოცნებებით გაურბის. მთავარ როლს ბენ სტილერი ასრულებს, რომელიც ფილმის რეჟისორიც არის. “უოლტერ მიტის საიდუმლო ცხოვრება” მაყურებელს საშუალებას აძლევს დატკბეს ისლანდიის ბუნებით, სიმშვიდით, გზებითა და მთებით…