ქვემოთ ჩამოთვლილი ფილმები სხვადასხვა ჟანრს მიეკუთვნება და გარდა იმისა, რომ ყველა მათგანი ბრწყინვალე ნამუშევარია, ისინი ქალურობის ასპექტებს იკვლევს და სრულად წარმოაჩენს მის მშვენიერებას. ესაა 10 ფილმი ქალურ სილამაზეზე:
ვერონიკას ორმაგი ცხოვრება (1991)
სიუჟეტის ცენტრში ორი იდენტური ქალია, რომელიც სხვადასხვა ქვეყანაში, განსხვავებული ცხოვრებით ცხოვრობს და ერთმანეთს არასდროს შეხვედრია. ამის მიუხედავად, ერთ-ერთის სიკვდილი მეორეს ცხოვრებას სამუდამოდ ცვლის.
დიდი იმედები (1998)
ჩარლზ დიკენსის რომანზე დაფუძნებული ფილმი აღწერს ორ პერიოდს ქალისა და მამაკაცის რომანტიკული ურთიერთობიდან. მათი სიყვარული და ნიუანსები, რომელიც ამ ურთიერთობას ახლავს, სუნთქვას შეგიკრავთ, განსაკუთრებით მათ, ვინც შეყვარებული ხართ.
ფართოდ დახუჭული თვალები (1999)
ქორწინება რთულ ფაზაში შედის და ახალგაზრდა, პრესტიჟული ექიმი ნიუ-იორკის სიურრეალისტურ, ვნებებით აღსავსე ღამის სამყაროში აღმოჩნდება. საიდუმლო წვეულებაზე კი მოულოდნელად საკუთარ ცოლს ხედავს.
ყოფის აუტანელი სიმსუბუქე (1988)
1960-იანი წლები. პრაღა. სიუჟეტი სასიყვარულო სამკუთხედის ირგვლივ ვითარდება და ცხოვრების მრავალფეროვან ასპექტებს გვიჩვენებს. ეს არის მილან კუნდერას გახმაურებული რომანის შესანიშნავი ეკრანიზაცია, რომლის ავტორიც ფილიპ კაუფმანი გახლავთ.
ლურჯი ყველაზე თბილი ფერია (2013)
ეროტიკული სცენებით სავსე ფილმის მთავარი გმირი თინეიჯერი გოგონაა, რომელიც ღრმა კავშირს გრძნობს ლურჯთმიან სტუდენტთან. ეს ემოციური სურათი გვიჩვენებს ძიების პროცესს, თვითგამორკვევის მცდელობას, რაც ძალიან რეალისტურადაა ნაჩვენები.
სასიყვარულო განწყობა (2000)
ბრწყინვალე კინემატოგრაფიული ნამუშევარი, მელანქოლიური ატმოსფერო, ლამაზი და სევდიანი ისტორია, მსახიობთა შთამბეჭდავი შესრულება… ვონ კარ-ვაი საოცრად გადმოსცემს ორი მარტოსული ადამიანის უჩვეულო ურთიერთობას.
ქეროლი (2015)
1950-იანი წლები. დაქორწინებული ქალი ახალგაზრდა ფოტოგრაფისადმი ძლიერ ვნებას გრძნობს. ფილმი ასახავს ამ ვნების შედეგებს მთავარი გმირების ცხოვრებაში, დესტრუქციულ ოჯახურ გარემოსა და სოციუმის გავლენას ინდივიდზე.
დანიელი გოგონა (2015)
1920-იანი წლების კოპენჰაგენი. მხატვარი ცოლის თხოვნით, ეინერი ქალივით გამოეწყობა და ხატვის პროცესში აცნობიერებს, რომ თავს კომფორტულად სწორედ ამ ფორმაში, ამ იდენტობაში გრძნობს, რომ საკუთარი სილამაზე შეიცნო. ის სქესის შესაცვლელად ოპერაციის გაკეთებას გადაწყვეტს, რაც საშინლად ტრაგიკული მოვლენების ფონზე ხდება.
სამი ფერი: ლურჯი (1993)
მეუღლისა და პატარა შვილის სიკვდილის შემდეგ, ახალგაზრდა ქალი ყველანაირად ცდილობს, როგორმე ცხოვრება განაგრძოს. ეს საკმაოდ რთული და ემოციურად მძიმე სურათია, რომელიც გვარწმუნებს, რომ ნებისმიერი ტრაგიკული მოვლენის აღქმაც და გადატანაც ინდივიდუალურია.
მხატვარი და ნატურა (2012)
ასაკოვანი მოქანდაკე, რომელიც ცოლთან ერთად იზოლირებულად ცხოვრობს და ყველაფერზე გული აქვს აცრუებული, ახალგაზრდა ლტოლვილ გოგონასთან შეხვედრის შემდეგ საოცარ გამოცოცხლებას გრძნობს. მას სურს, გოგონა მისი უკანასკნელი ნამუშევრის მოდელი გახდეს.
