დღევანდელ კოლექციაში მოვაქციეთ ისეთი ფილმები, რომლებიც ოჯახურ პრობლემებზე და სირთულეებზე გვიყვება. ასევე ვთვლით, რომ ეს ფილმები აუცილებლად დაგეხმარებათ სხვანაირად შეხედოთ საკუთარ ურთიერთობებს და მნიშვნელოვანი ცვლილებებისკენ მყარი ნაბიჯები გადადგათ.

ვინ იცის, იქნებ ფსიქოლოგის სეანსისთვის გადადებული ფულიც კი დაგაზოგინოთ?! მოკლედ, დავიწყოთ:

ვის ეშინია ვირჯინია ვულფის? (1966)

მაიკ ნიკოლსის იდუმალი და საკმაოდ ძლიერი დრამა. რეჟისორმა მოახერხა ერთი შეხედვით ჩვეულებრივი ოჯახის ყველა დამალული სკილეტის ჩვენება, მან თავისი მაყურებლისთვის ყველა საიდუმლოს ახადა ფარდა: წყვილი გამუდმებით კამათობს, ისინი ცდილობენ რაც შეიძლება მეტად ატკინონ ერთმანეთს გული. მათი სტუმრები ერთი დიდი თამაშის მონაწილეები ხდებიან, თამაშის, რომელსაც ეს ოჯახი თამაშობს: ეცადონ მაქსიმალურად დამალონ თავიანთი უბედურება. ფილმმა ოსკარის 13 ნომინაციიდან ხუთში გაიმარჯვა.

ორნი გზაზე (1967)

სტენლი დონენის არაჩვეულებრივი ფილმი, რომელიც გვიჩვენებს, რომ სიყვარული ყოველთვის ცოცხალია, უბრალოდ ჩვენ ვივიწყებთ ხოლმე ამის შესახებ. სიუჟეტის მიხედვით წყვილი ურთიერთობის კრიზისს განიცდის, მაგრამ ცდილობენ თავიანთი სიყვარული გადაარჩინონ. ამისთვის ისინი საფრანგეთში მიემგზავრებიან, იქ, სადაც პირველად შეხვდნენ და შეუყვარდათ ერთმანეთი. როგორ არ დავანგრიოთ ოჯახი სითბოს და პატივისცემის შენარჩუნებით? დონენის ფილმი ოსკარზე საუკეთესო ორიგინალური სცენარისთვის იყო ნომინირებული.

ქმრები და ცოლები (1992)

ვუდი ალენის ტრაგიკომედია, ადამიანის, რომელსაც არაჩვეულებრივად და იუმორით შეუძლია მოგვითხროს ყველაზე სევდიანი ისტორიაც კი. მისი ეს კინოფირი მოგვითხრობს მწერლის ისტორიას, რომელიც სავსეა ოჯახური კონფლიქტებით. ერთხელაც ის და მისი მეუღლე იგებენ, რომ მათმა დიდი ხნის მეგობრებმა განქორწინება გადაწყვიტეს. რა რეაქცია უნდა ჰქონდეთ ამ სიახლეზე? ერთი მხრივ, წინ ახალი ურთიერთობების პერსპექტივები იშლება, მეორე მხრივ კი – ურთიერთობის გაწყვეტა ადამიანთან, რომელთან ერთადაც უკვე წლებია ცხოვრობ… ალენის ფილმმა ოსკარის ორი ნომინაცია დაიმსახურა.

შემოდგომა ნიუ-იორკში (2000)

შეუძლია თუ არა უფროს მამაკაცს, რომელსაც არ აქვს სერიოზული ურთიერთობები, შეუყვარდეს ახალგაზრდა და ლამაზი გოგონა? თანაც ისე, რომ მისთვის ყველაფრის გაკეთება შესძლოს? თურმე, შეუძლია, თუ არ გავითვალისწინებთ იმ ტრაგიკულ გარემოებებს, რომლებთან შეჯახებაც მოუწიათ შეყვარებულებს. ჯოან ჩენის ფილმის მთავარი სათქმელი კი ის არის, რომ გიყვარდეთ ერთმანეთი, სანამ დრო გაქვთ და არ დაკარგოთ ტყუილად არც ერთი წუთი.

მზის ჩასვლამდე (2004)

ჩვენ გვავიწყდება ხოლმე, რომ ხანდახან ჩვენ თვითონ ვკრავთ ხელს ჩვენს ბედნიერებას და რაღაცის მუდმივ მოლოდინს ვიქმნით. სწორად ასე დაემართათ ამ ფილმის მთავარ გმირებს, ჯული დელპის და ეტან ჰოუკის პერსონაჟებს, როდესაც შემთხვევითი შეხვედრის დასრულების შემდეგ, მათში სიყვარულის ნაპერწკალი დარჩა. მაგრამ ბედმა ისინი ცხრა წლის შემდეგ კვლავ შეახვედრა, მაგრამ ამჯერად მათ სულ რამდენიმე საათის გატარება შეუძლიათ ერთად. რა შეიძლება გავიაზროთ ასეთ მოკლე დროში? მხოლოდ ერთი რამ: ამ ადამიანთან განშორება აღარ შეიძლება… რიჩარდ ლინკლეიტერის ფილმი, რომელიც მაყურებლისთვის დღემდე ერთ-ერთ საყვარელ მელოდრამად რჩება, ოსკარზე საუკეთესო ადაპტირებული სცენარისთვის იყო ნომინირებული.

5×2 (2004)

ფრანგი რეჟისორის ფრანსუა ოზონის გასაოცარი ფილმი, რომელიც მაყურებელს აჩვენებს, თუ სადამდე შეიძლება მიიყვანოს ადამიანი მუდმივმა წყენებმა, ჩხუბმა და კონფლიქტმა. ოზონი თავის ნამუშევარში ახალგაზრდა წყვილის ოჯახურ 5 სცენას საპირისპირო თანმიმდევრობით მოგვითხრობს: განქორწინება და მისი შედეგები, შეხვედრა მეგობრებთან, შვილის დაბადება, ქორწილი და გაცნობა. სად ვეძებოთ ის მომენტი, როდესაც სიყვარული მთავრდება? და რატომ ღირს დავაფასოთ ჩვენი ცხოვრების ყველაზე ნათელი მომენტები? ფრანსუა ოზონმა იცის ამ კითხვებზე პასუხი…

2 დღე პარიზში (2007)

ახალგაზრდა წყვილი ოჯახურ სირთულეებს ხვდებიან და ცდილობენ თავიანთი გრძნობები გააცოცხლონ. ამისთვის ისინი სიყვარულის ცენტრად აღიარებულ ქალაქში მიემგზავრებიან. ადამ გოლდბერგის პერსონაჟმა იცის, რომ პარიზში მეუღლის (ჯული დელპის) პერსონაჟის მშობლები ცხოვრობენ, მაგრამ ის იქვე ხვდება მის ყოფილ ბოიფრენდებსაც. წყვილის წინაშე მთავარი კითხვა ჩნდება: როგორ გააუმჯობესონ ურთიერთობა და გააცოცხლონ გრძნობები, როდესაც ყველაფერი მხოლოდ უარესობისკენ მიდის?!

ცვლილებების გზა (2008)

სემ მენდესის ფილმი იმის შესახებ, თუ რა მნიშვნელოვანია იბრძოლოთ საკუთარი სურვილებისთვის და ოცნებებისთვის და რამდენად მნიშვნელოვანია იპოვოთ ადამიანი, რომელიც გვერდში დაგიდგებათ. და ეს ყოველთვის იქნება ორმხრივი, მაგრამ რატომღაც ამ ფილმის მთავარ გმირებს ეს არ ახსოვდათ და აკეთებდნენ ყველაფერს, რომ ოჯახი გარეგნულად შეენარჩუნებინათ, მაგრამ გრძნობებს განადგურების უფლებას აძლევდნენ. მენდესის ფილმი ოსკარის სამ კატეგორიაში იყო ნომინირებული.

სევდიანი ვალენტინი (2010)

სიყვარულს შეუძლია ბედნიერებისგან ყველანაირ რეალობას მოგვწყვიტოს და ოცნებებში გვაფრინოს, მაგრამ ასევე შეუძლია ბორკილებით შებოჭილ მძევლად გვაგრძნობინოს თავი, თუ ის ტანჯვად გვექცევა და არა სიამოვნებად. სწორად ასე ემართებათ დერეკ სიენფრენსის ფილმის გმირებსაც, რომლებიც გრძნობებში ისე იყვნენ ჩაფლულები, რომ ვერც კი შეამჩნიეს, როგორ დაიწყეს ერთმანეთის დახრჩობა თავიანთი სიყვარულით. შეძლებენ თუ არა ახალგაზრდები ურთიერთობის აღდგენას და მისცემენ თუ არა თავიანთ გრძნობებს კიდევ ერთ შანსს?! მიშელ უილიამსი ოსკარზე საუკეთესო მსახიობი ქალისთვის იყო ნომინირებული.

სიყვარული (2012)

და ბოლო, ოსკარის გამარჯვებული საუკეთესო უცხოენოვანი ფილმისთვის. რეჟისორი მიჰაელ ჰანეკეს არ დაუწყია ბევრი ფიქრი დამაინტრიგებელი სათაურისთვის და მარტივად, ერთი სიტყვა აარჩია – სიყვარული. მან მოგვითხრო გულწრფელი და გულისამაჩუყებელი ისტორია ოჯახზე, რომლის სიყვარული და მზრუნველობა ვერ შეასუსტა ვერც თანაცხოვრების განვლილმა წლებმა, ვერც სერიოზულმა ავადმყოფობამ. სიუჟეტის მიხედვით წყვილმა მთელი ცხოვრება ერთად გაატარა, მაგრამ ასაკში შესულ ემანიუელ რივას პერსონაჟს, ანას სერიოზული პრობლემები შეექმნა: ჯერ პრობლემები მეხსიერებასთან, შემდეგ სხეული აღარ ემორჩილება, ბოლოს კი – დამბლა. მისი მეუღლე კი, რომელსაც ჟან-ლუი ტრენტინიანი ასრულებს, გადაწყვეტს, რომ რადაც არ უნდა დაუჯდეს, საყვარელი ქალის გვერდით იყოს.