ქვემოთ ჩამოთვლილი ფილმების ძირითადი თემა ობსესიაა, იქნება ეს მთავარი გმირის აკვიატებული ქმედებები თუ რაიმეთი შეპყრობილობა – თუმცა, არა მხოლოდ უარყოფით ასპექტში. მოკლედ, გთავაზობთ 10 ფილმს ობსესიაზე:
ნავთობი (2007)
პოლ ტომას ანდერსონის გენიალური ფილმი მოგვითხრობს ნავთობმაგნატზე, რომელიც სიხარბითა და ძალაუფლების წყურვილითაა შეპყრობილი. მიზნისკენ სწრაფვის პროცესში კი ადამიანურ სახეს კარგავს. ეს არის დიდი აღზევების ისტორია, რომელიც სინამდვილეში დიდი დაცემის ისტორიაა.
მთელი ეს აურზაური (1979)
ქორეოგრაფი ჯო გიდეონის ცხოვრებას ქალები, ნარკოტიკი და სასმელი შეადგენს. ობსესია ამ შემთხვევაში უბრალო ცხოვრებისეული შემთხვევების სიყვარულია, თუმცა, ეს სიყვარული სხვა ადამიანების გულის ტკენაზე გადის.
ვენერა ქურქში (2013)
ფილმი მოგვითხრობს რეჟისორის შეპყრობილობას მსახიობი ქალის ნატურით. ჩვენ ვხედავთ, როგორ ანგრევს ობსესია მორალურ და ეთიკურ ნორმებს და რაოდენ დიდია ინსტინქტის ძალა.
სტრინგერი (2014)
სამსახურის უშედეგო ძებნის შემდეგ, ახალგაზრდა კაცი აღმოაჩენს, რომ უბედური შემთხვევების ფოტოგრაფირებით საკმაოდ დიდი ფულის შოვნა შეიძლება. ის უფრო და უფრო შეპყრობილი ხდება ამ საქმით და საბოლოოდ ყოველგვარ მორალს კარგავს.
ჭეშმარიტი სევდა (1997)
ცნობილი პოპ ჯგუფის მომღერალი კარიერის მიტოვებას გადაწყვეტს, რათა ოცნება აისრულოს და გახდეს მსახიობი. ყველაფერი, რაც მის გადაწყვეტილებას მოჰყვება, სრული დისორიენტაციაა რეალობაში და გვარწმუნებს, რომ ზოგჯერ ჩვენი აკვიატებული ოცნებები ჩვენს წინააღმდეგ მუშაობს.
სამი ფერი: თეთრი (1994)
თავის ფრანგ ცოლთან განქორწინების შემდეგ, პოლონელი კაცი სამშობლოში ბრუნდება და იწყებს ფიქრს საშინელ შურისძიებაზე ქალისადმი, რომელთანაც ერთ დროს დიდი სიყვარული აკავშირებდა…
სურვილის ბნელი ობიექტი (1977)
ფილმი მოგვითხრობს ასაკოვან კაცზე, რომელიც შეპყრობილი ხდება ახალგაზრდა ქალით. ამ სურათში ობსესიისა და ვნების ძალიან ბევრი ნიუანსია, რომელიც ლუის ბუნუელმა ზუსტად გადმოსცა.
ხიდი მდინარე კვაიზე (1957)
მეორე მსოფლიო ომის დროს, იაპონელების მიერ დატყვევებული ბრიტანელი ჯარისკაცები დავალებას იღებენ – ააშენონ ხიდი მდინარე კვაიზე. ჯარისკაცებს ხიდის საბოტაჟი სურთ, თუმცა პოლკოვნიკი მათ საპირისპიროში არწმუნებს, რისი საფუძველიც მისი მყარი, აკვიატებამდე მისული მორალური ღირებულებებია.
ფიცკარალდო (1982)
ფილმი მოგვითხრობს კაცზე, რომელიც შეპყრობილია იდეით – ააშენოს ოპერა შუაგულ ჯუნგლებში. ის მიზნისთვის არაფერს იშურებს, რაც ძალიან აახლოვებს შეშლილობასთან.
კინომოყვარული (1979)
თავიდან მას სურს, თავისი ახალდაბადებული შვილის ცხოვრების ყველა მნიშვნელოვანი მომენტი ასახოს. მოგვიანებით კი ეს ყველაფერი კამერით შეპყრობილობად იქცევა. ესაა ფილმი ცხოვრებასა და მნიშვნელოვან მომენტებზე.
