ახალი წელი უკვე მოვიდა და ყველა ცდილობს, რომ შესაბამისი განწყობა საშობაო ფილმებით შეიქმნას. თუმცა არსებობენ გამონაკლისებიც და თუ თქვენც მათ რიგებს მიეკუთვნებით, გირჩევთ უყუროთ ფილმებს, რომლებიც სპეციალურად თქვენთვის შევარჩიეთ.
გთავაზობთ 2017 წლის 10 საინტერესო ფილმს, რომელიც, შესაძლოა გამოგრჩათ:
ტელმა
ნორვეგიული ფილმი ხოაკიმ ტრიერისაგან მოგვითხრობს ახალგაზრდა გოგონას შესახებ, რომელიც ზებუნებრივი ძალებითაა შეპყრობილი. ის ახალ ცხოვრებას იწყებს კოლეჯში, რაც მის რელიგიურ მშობლებს შიშის საფუძველს აძლევს, თავად მას კი კურსელი გოგონასადმი რომანტიკულ გრძნობებს უღვივებს. ტელმას ნებისმიერი მძაფრი ემოცია, იქნება ეს ბრაზი თუ ეჭვიანობა, არაბუნებრივი მოვლენებით გამოიხატება. ეს ყოველივე კი პიკს მაშინ აღწევს, როდესაც ანია უჩინარდება და ტელმა ამაში საკუთარ თავს ადანაშაულებს.
მოჩვენებების ქალაქი
2014 წლიდან, ISIS-მა სირიის ქალაქი რაქა საკუთარ ე.წ. დედაქალაქდა გამოაცხადა. ფილმი მოგვითხრობს ლოკალურ ჟურნალისტთა ჯგუფის შესახებ, რომელიც ისლამური სახელმწიფოს წინააღმდეგ ილაშქრებს და, ასევე, ცდილობს მსოფლიოს მიაწვდინოს ხმა იმის შესახებ, თუ რა ხდება რეალურად მათს სამშობლოში.
კვადრატი
ფილმი ერთგვარი სატირული დრამაა თანამედროვე სამყაროსა და ადამიანის შესახებ. ის ეხება ისეთ თემებს, როგორებიცაა ერთიანობის შეგრძნება, გამბედაობა და შეძლებული ადამიანების მოთხოვნილებები. სიუჟეტის ცენტრში მოქცეულია მუზეუმის დირექტორი, კრისტიანი, რომელიც ახალ ინსტალაციას “კვადრატს” წარმოადგენს. მისი მიზანია, დამთვალიერებელს შეახსენოს ალტრუიზმისა და მოქალაქეობრივი პასუხისმგებლობის შესახებ, თუმცა მისი იდეალები ინგრევა მას შემდეგ, რაც მის ტელეფონს მოიპარავენ, პიარ სააგენტო კი “კვადრატისათვის” წარუმატებელ მარკეტინგულ კამპანიას განახორციელებს.
წმინდა ირმის მკვლელობა
კოლინ ფარელი და იორგოს ლანთიმოსი ლობსტერის შემდეგ კვლავ გაერთიანდნენ. ამჯერად მათ ნიკოლ კიდმანიც შეუერთდა და ასე მივიღეთ შესანიშნავი ფილმი სტივენისა და ემას ბედნიერი ოჯახის შესახებ, სადაც 16 წლის მარტინის გამოჩენა ყველაფერს ცვლის. სიუჟეტს ფონად გასდევს ბიბლიური და ზღაპრული ალეგორიები დანაშაულისა და სასჯელის შესახებ.
მაიროვიცის ოჯახის ისტორიები
ადამ სენდლერის, დასტინ ჰოფმანისა და ბენ სტილერის შესანიშნავი კომედია მოგვითხრობს უცნაური ოჯახის შესახებ, რომელიც ნიუ იორკში, არტისტი მამის გამოფენის სანახავად იკრიბება. ფილმში საინტერესოდაა წარმოჩენილი ოჯახური ურთიერთობები, მშობლების გავლენა შვილებზე და და-ძმური უთანხმოებები. რეჟისორისა და სცენარისტის ნამუშევართან ერთად, აღნსანიშნავია მსახიობების შეუდარებელი თამაშიც.
კოლუმბუსი
ფილმი მოგვითხრობს კორეელი მამაკაცის შესახებ, რომლის მამაც კომაშია ჩავარდნილი და ამის გამო იძულებულია მასთან ერთად კოლუმბუსში დარჩეს. ის ხვდება ახალგაზრდა გოგონას, რომელიც ასევე კოლუმბუსშია გაწედილი დედამისის გამო. ერთი შეხედვით, ეს გავს რომანტიკულ ისტორიას წყვილის შეხვედრის შესახებ, თუმცა, სინამდვილეში, ის უფრო მეტად განსხვავებული ადამიანებისა და მათ შორის გაჩენილი უხილავი ძაფების შესახებაა. სიუჟეტს ფონად ერთდროულად გასდევს, როგორც მელანქოლიური, ასევე იმედისმომცემი ატმოსფერო.
მარჯორი პრაიმი
წლის ყველაზე ამაღელვებელი ფილმი მოგვითხრობს ხანში შესული მარჯორის შესახებ, რომელიც სიცოცხლის უკანასკნელ დღეებს ზღვისპირა სახლში ატარებს და შესაძლებლობა აქვს რომ გარდაცვლილი მეუღლის ჰოლოგრაფიკულ პროექციას ესაუბროს. სპაიკ ჯონსის ფილმის “ის” შემდეგ, ეს არის პირველი ისტორია, სადაც კომპიუტერული ტექნოლოგიის სულიერებას მაყურებელში მძაფრი ემოციების გამოწვევა შეუძლია.
ლედი მაკბეტი
ნიკოლაი ლესკოვის ნოველის შესანიშნავი ეკრანიზაცია მოგვითხრობს ახალგაზრდა ქალზე, რომელიც საკუთარი ნების წინააღმდეგ მდიდარ კაცზე გაათხოვეს. მას უწევს ცხოვრება კაცთან, რომელიც არა თუ არ უყვარს, არამედ აუტანლადაც კი ეპყრობა ქალს და მუდმივად ახსენებს, რომ ის იყიდა. ამ ყოველივეს მიუხედავად, ლედი მაკბეტი არ ნებდება და ეძებს საკუთარ ბედნიერებასა და სიყვარულს, რომელსაც ქმრის ერთ-ერთ მუშასთან პოულობს. მოგვიანებით, კი ეს ყველაფერი მამულში საშინელ ამბებს იწვევს.
ამ სამყაროში ვეღარ ვგრძნობ თავს ისე, როგორც ადრე
მას შედმეგ, რაც რუთის სახლს დააყაჩაღებენ, ის მეზობელ ტონისთან (ელაიჯა ვუდი) ერთად დაკარგული ნივთების ძებნას იწყებს. სწორედ ამ მომენტიდან იწყება მათი ბინძური, სისხლიანი და სასაცილო თავგადასავალი.
ოკჯა
ფილმი ერთგვარი იგავია სამხრეთ კორეელი გოგონასა და მისი უცნაური ჯიშის გოჭის მეგობრობაზე. მიჯა ყველაფერზე მიდის ოღონდ თავისი საუკეთესო მეგობარი უდიდესი საკვები კორპორაციის კლანჭებისაგან იხსნას, თუმცა ეს არც თუ ისე მარტივი მისიაა – გოჭის გადარჩენის სურვილით შეპყრობილ გოგონას გზად კაპიტალისტებთან, დემონსტრატორებთან და მომხმარებელთან გამკლავებაც უწევს.
