კოლონია სამი სეზონისაგან შემდგარი ამერიკული ტელესერიალია, რომელიც უახლოესი მომავლის სამყაროს წარმოგვიდგენს. მოქმედება ოკუპირებულ ლოს ანჯელესში ვითარდება, სადაც FBI-ს აგენტი ცდილობს საკუთარი ოჯახი და მოსახლეობა გადაარჩინოს – სწორედ ასე ებმება ის პოლიტიკურ თამაშში, რომელიც მაყურებელს ძალიან საინტერესო და ჩამთრევ შოუდ ევლინება.
მაშ ასე, წარმოგიდგენთ 5 მიზეზს იმისთვის, რომ “კოლონიის” ყურება ახლავე დაიწყოთ:
1. გამოცდილი შემოქმედებითი ჯგუფი
დაკარგულები, ბეიტსის მოტელი, შტამი – ეს იმ ცნობილი სერიალების არასრული ჩამონათვალია, რომლებზეც “კოლონიის” შემქმნელებს აქამდე უმუშავიათ. მათ შესანიშნავად იციან, თუ როგორ ითამაშონ მაყურებლის გრძნობებით, გაგვაოცონ ყველაზე მოულოდნელი გადაწყვეტილებებით და მიგვაჯაჭვონ ტელეეკრანებს იმის მოლოდინში, თუ რა მოხდება შემდეგ ეპიზოდში.
2. ჯოშ ჰოლოუეი
დაკარგულების თაყვანისმცემლები ამ პუნქტს განსაკუთრებით დააფასებენ, რადგან ჩვენ ყველას ძალიან მოგვენატრა სოიერი! ის, რა თქმა უნდა, თავის ქარიზმას არ კარგავს, თუმცა ამჯერად სრულიად განსხვავებულ ამპლუაში გვევლინება და განასახიერებს უილ ბოუმენს, FBI-ის ყოფილ აგენტს, რომელი პირველ რიგში მამა და მეუღლე, შემდეგ უკვე კი ეროვნული გმირია!
3. ეს არ არის შოუ უბრალოდ უცხოპლანეტელთა შემოჭრაზე
სიუჟეტი ნაკლებად ფოკუსირდება ოკუპაციის დეტალებზე და მეტ ყურადღებას უთმობს ისეთ მნიშვნელოვან საკითხებს, როგორებიცაა ადამიანური ურთიერთობები, ოჯახური სიყვარული, თვითგადარჩენისათვის ბრძოლა და ა.შ.
სხვათა შორის, კოლონიის მთავარ ანტაგონისტებად არა უცხოპლანეტელები, არამედ ისევ და ისევ ადამიანები გვევლინებიან, რომლებიც კრიზისული პერიოდის დროს ერთმანეთის მიმართ სისასტიკესა და შეუბრალებლობას იჩენენ. ამ მხრივ, შოუ აუცილებლად მოგაგონებთ მოსიარულე მკვდრებს, სადაც ზომბებზე დიდ საშიშროებას თავად გადარჩენილები წარმოადგენენ.
4. ნაცნობი სახეებით დაკომპლექტებული სამსახიობო შემადგენლობა
ჯოშის გარდა სერიალში არაერთ ნაცნობ სახეს ვხვდებით. მოსიარულე მკვდრები ვახსენეთ და აქვე უნდა აღვნიშნოთ სარა უეინ კოლისიც, რომელიც უილის ცოლს განასახიერებს. ის ძალიან ძლიერი პერსონაჟია და საკუთარ ოჯახს ნებისმიერ ფასად იცავს.
კოლონიაში ასევე გვევლინებიან ისეთი მსახიობები, როგორებიც არიან: პიტერ იაკობსონი, ადრიან პასდარი, ამანდა რიგეტი, ტორა ბირჩი და ა.შ.
5. ისტორიული ფონი
მიუხედავად იმისა, რომ სიუჟეტი თანამედროვეობაში ვითარდება, შეუძლებელია, ვერ შევამჩნიოთ ის ისტორიული გავლენები, რაც მეორე მსოფლიო ომისა და ნაცისტური ოკუპაციის პერიოდზე მიგვითითებს. ამასთანავე, შოუ არც დღევანდელი პოლიტიკური მოვლენების წარმოჩენას ერიდება და სიუჟეტში ავღანეთში მიმდინარე პროცესების ანარეკლს გვიჩვენებს, რაც მას კიდევ უფრო რეალურსა და შემზარავად ნაცნობს ხდის…
